အိုက်ပွီး၊ ဖေဖော်ဝါရီ ၂၂ ရက်၊ မလေးရှား
မလေးရှားနိုင်ငံ ဆလန်ဂေါပြည်နယ် ကလန်းမြို့ မဲရူးဈေးကြီးမှာ မြန်မာနိုင်ငံသား ၅၃၀ ဦးအပါအဝင် အထောက်အထားမဲ့ နိုင်ငံခြားသား ၆၃၀ ဦး ဖမ်းဆီးခံရတယ်လို့ မလေးရှားရောက် မြန်မာနိုင်ငံသားတွေဆီက သိရပါတယ်။
ဖမ်းဆီးခံရတဲ့ နိုင်ငံခြားသားတွေဟာ မြန်မာ ၅၃၀ ဦး၊ ဘင်္ဂလားဒေ့ရှ် ၈၅ ဦး၊ အင်ဒိုနီးရှား ၉ ဦး၊ အိန္ဒိယ ၅ ဦးနဲ့ နီပေါ ၁ ဦးတို့ ဖြစ်ပါတယ်။
အဲဒီထဲမှာ အမျိုးသမီးနှစ်ဦး ပါဝင်ပြီး ဖမ်းဆီးခံရသူတွေဟာ အသက် ၁၇ နှစ်မှ ၅၇ နှစ်ကြား ဖြစ်ပါတယ်။
ဒီနေ့ ဖေဖော်ဝါရီ ၂၂ ရက် မနက် ၅ နာရီက ကလန်းမြို့ မဲရူးစျေးကြီးမှာ အလုပ်လုပ်ကိုင်တဲ့ နိုင်ငံခြားသားတွေ မလေးရှားအာဏာပိုင်တွေက ဝင်ရောက် စစ်ဆေးခဲ့ရာ အထောက်အထားမဲ့ နိုင်ငံခြားသားတွေ ဖမ်းဆီးခံရတာ ဖြစ်ပါတယ်။
“မဲရူးစျေးမှာ နိုင်ငံခြားသားတွေ စျေးရောင်းတာတွေ၊ အလုပ် လုပ်ကိုင်တာတွေ အရမ်းများတယ်။ အများစုကတော့ အထောက်အထား မရှိကြဘူး။ အဲဒါတွေကြောင့်လည်း နိုင်ငံသားတွေက မကြိုက်ဘူး။ ဒါကြောင့် ဝင်စစ်ဆေးတာပါ။ အထောက်အထား မပြည့်စုံသူတွေက တစ်ခါတည်း ဖမ်းဆီးခံရတာပါ” လို့ မလေးရှားရောက် မြန်မာနိုင်ငံသားတစ်ဦးက ရွှေဖီမြေသို့ ပြောပါတယ်။
ဖမ်းဆီးခံရသူတွေဟာ တရားမဝင် နေထိုင်တာ၊ အထောက်အထားမရှိဘဲ အလုပ်လုပ်ကိုင်တာတွေကြောင့် မလေးရှား လူဝင်မှုကြီးကြပ်ရေးအက်ဥပဒေနဲ့ ဆက်လက် အရေးယူဆောင်ရွက်သွားမယ်လို့ ဆလန်ဂေါ လဝကဘက်က ထုတ်ပြန်ပါတယ်။
ဖေဖော်ဝါရီ ၂၀ ရက် ညကလည်း ထိုင်း-မလေးရှားနယ်စပ် တစ်နေရာမှာ မလေးရှားကို ဝင်ရောက်လာတဲ့ ကလေးအပါအဝင် မြန်မာနိုင်ငံသား ၂၉ ဦးကို မလေးရှား ရဲတပ်ဖွဲ့က ဖမ်းဆီးခဲ့ပါတယ်။
