အိုက်ပွီး၊ ဇန်နဝါရီ ၂၃ ရက်၊ မလေးရှား
မလေးရှားနိုင်ငံ ကွာလာလမ်ပူမြို့ ဂျလန်အာလောနဲ့ ဘူကစ်ဘင်တန်းမှာ အထောက်အထားမဲ့ မြန်မာနိုင်ငံသား အမျိုးသမီး အမျိုးသားအပါအဝင် ၆၀ ဦး ဖမ်းဆီးခံရတယ်လို့ မလေးရှားနိုင်ငံရောက် မြန်မာနိုင်ငံသားတွေဆီက သိရပါတယ်။
နိုင်ငံခြားသားနဲ့ လူစည်ကားတဲ့နေရာ၊ အလုပ် လုပ်ကိုင်နေကြတဲ့ နေရာတွေကို မနေ့ ဇန်နဝါရီ ၂၂ ရက် ည ၇ နာရီ ၁၅ မိနစ်မှာ မလေးရှား ရဲတပ်ဖွဲ့၊ လဝကနဲ့ အာဏာပိုင်အဖွဲ့က ရှောင်တခင် ဝင်ရောက်စစ်ဆေးခဲ့ရာ အထောက်ထားမဲ့ မြန်မာနိုင်ငံသား ၆၀ ဦး ဖမ်းဆီးခံရတာပဲ ဖြစ်ပါတယ်။
“အခု ဖမ်းဆီးခံရတဲ့နေရာမှာ မြန်မာဆိုင်တွေ ချင်းဆိုင်တွေ များတယ်။ ပြီးတော့ တရုတ် စားသောက်ဆိုင်မှာလုပ်တဲ့ ဝန်ထမ်းတွေကလည်း မြန်မာတွေ များတယ်။ KL မှာ အထင်ကရ၊ လူစည်ကားတဲ့နေရာလည်းဖြစ်တယ်။ နိုင်ငံခြားသားတွေလည်း များတယ်။ အဲဒါကြောင့် စစ်ဆေးသွားတာဖြစ်မယ်” လို့ မလေးရှားနိုင်ငံရောက် မြန်မာနိုင်ငံသားတစ်ဦးက ရွှေဖီမြေသို့ ပြောပါတယ်။
မြန်မာနိုင်ငံသား ၆၀ ဦးအပြင် ဘင်္ဂလားဒေ့ရှ် နိုင်ငံသား ၇၁ ဦး၊ အင်ဒိုနီးရှား ၂၄ ဦး၊ နီပေါ ၁၆ ဦး၊ ပါကစ္စတန် ၃ ဦး၊ အီဂျစ် ၁ ဦးနဲ့ ဆူဒန် ၁ ဦးတို့လည်း ပါဝင်ပြီး ၎င်းတို့ကို ကွာလာလမ်ပူမြို့ လဝကရုံးမှာ ထိန်းသိမ်းထားတယ်လို့ သိရပါတယ်။
ဖမ်းဆီးခံရတဲ့ နိုင်ငံခြားသားတွေကို လူဝင်မှုကြီးကြပ်ရေး အက်ဥပဒေ ပုဒ်မ ၆(၁)(ဂ)၊ ၁၅(၁)(ဂ) ၁၉၅၉၊ ၁၉၆၃ အပြင် ၃၉(ခ) ၁၉၆၃ နဲ့ စစ်ဆေးသွားမယ်လို့ မလေးရှား လဝက ဒီနေ့မနက်မှာ ထုတ်ပြန်ထားပါတယ်။
ပြီးခဲ့တဲ့ ဇန်နဝါရီ ၁၅ ရက်နဲ့ ၁၆ ရက်ကလည်း ပါဟန်းပြည်နယ်မှာ နိုင်ငံခြားသားတွေ အလုပ် လုပ်ကိုင်နေတဲ့ စိုက်ပျိုးရေးနယ်မြေမှာ မလေးရှားအာဏာပိုင်တွေက ဝင်ရောက် စစ်ဆေးပြီး မြန်မာနိုင်ငံသား ၁၄ ဦးအပါဝင် ၁၀၀ ကျော် ဖမ်းဆီးခံခဲ့ရပါတယ်။
