အိုက်ပွီး၊ မေလ ၃၀ ရက်၊ မလေးရှား
မလေးရှားနိုင်ငံ၊ ဆလန်ဂေါပြည်နယ်၊ ဆလာယန်းမြို့မှာ မြန်မာနိုင်ငံသား ၁ထောင်ကျော်အပါအဝင် အထောက်အထားမဲ့ နိုင်ငံခြားသား ၁၄၀၀ကျော် ဖမ်းဆီးရမိတယ်လို့ ပြည်နယ်လူဝင်မှုကြီးကြပ်ရေးဌာနက ဒီနေ့ မေလ ၃၀ ရက်နေ့မှာ ထုတ်ပြန်ပါတယ်။
မနေ့ မေလ ၂၉ ရက်နေ့၊ ညတွင် နိုင်ငံခြားသားအများစု နေထိုင်ကြတဲ့ ဆလာယန်းမြို့က နေအိမ်တိုက်ခန်းတွေမှာ လဝကနဲ့ ဌာနပေါင်းစုံတွေက ဝင်ရောက်စစ်ဆေးခဲ့ရာ အထောက်အထားမဲ့ နိုင်ငံခြားသားတွေ ဖမ်းဆီးခံရတာဖြစ်ပါတယ်။
“အခုဖမ်းတဲ့ တိုက်ခန်းတွေမှာ မြန်မာတွေနေထိုင်တာများတယ်။ မနေ့ညက ဖမ်းတဲ့ထဲမှာလည်း မြန်မာတွေအများဆုံးပဲ။ ကလေးတွေ၊ လူကြီးတွေရော အကုန်ပါသွားတယ်။ တိုင်ကြားချက်ကြောင့် စစ်ဆေးတာမျိုး မဟုတ်တော့ဘဲ နိုင်ငံခြားသားတွေများလို့ စစ်ဆေးသွားတာပါ။ အဲမှာအထောက်အထားမရှိသူတွေ ဖမ်းဆီးခံရတာ။”လို့ မလေးရှားရောက် မြန်မာတစ်ဦးက ရွှေဖီမြေသို့ ပြောပါတယ်။
ဖမ်းဆီးခံရသူတွေထဲမှာ မြန်မာ ၁၂၂၂ ဦးနဲ့ အများဆုံးဖြစ်ပြီး ဘင်္ဂလားဒေ့ရှ် ၁၄၂ ဦးနဲ့ ဒုတိယအများဖြစ်ကာ အိန္ဒိယ ၉ ဦး၊ အင်ဒိုနီးရှား ၂ ဦး နဲ့ နီပေါတို့ဖြစ်ပြီး ၎င်းတို့ထဲမှာ အမျိုးသမီး၊ ကလေးတွေလည်း ပါဝင်တယ်လို့ သိရပါတယ်။
ဖမ်းဆီးခံရသူထဲက မြန်မာတချို့ဟာ ဒီနေ့ မေလ ၃၀ ရက်နေ့ မနက်မှာ ပြန်လွတ်လာသူတွေရှိသလို အများစုဟာ ပြန်မလွတ်လာကြသေးဘဲ ဖမ်းဆီးခံနေရဆဲဖြစ်ပါတယ်။
“မနေ့ညက ဖမ်းဆီးခံရတဲ့ထဲမှာ ဒုက္ခသည်(UN) ကတ် ကိုင်ဆောင်ထားသူတွေလည်းပါတယ်။ သူတို့တွေက ဒီနေ့မနက်မှာ ပြန်လွတ်ကြတယ်။ တချို့က အလုပ်သူဌေးကနေ ရွေးထုတ်ပေးလို့ ပြန်လွတ်ကြတယ်။ တချို့ကျတော့လည်း အဖွဲ့အစည်းကနေ ထုတ်ပေးတယ်။ လူအများစုက ပြန်မလွတ်လာကြသေးဘူး။”လို့ မလေးရှားရောက် မြန်မာတစ်ဦးက ရွှေဖီမြေသို့ ပြောပါတယ်။
မလေးရှားနိုင်ငံမှာ အကြောင်းအမျိုးမျိုးကြောင့် တရားမဝင်နေထိုင်ကြတဲ့ နိုင်ငံခြားသားတွေ ပြစ်ဒဏ်ကျခံစရာမလိုတော့ဘဲ တရားဝင် နေရပ်ပြန်လာနိုင်ဖို့ မလေးရှားအစိုးရက ပြီးခဲ့တဲ့ မေလ ၁၉ ရက်နေ့ကစပြီး ခွင့်ပြုထားပါတယ်။
ဒါ့အပြင် မလေးရှားနိုင်ငံမှာ တရားမဝင်နေထိုင်တဲ့ နိုင်ငံခြားသားတွေ တစ်နိုင်ငံအတိုင်းအတာနဲ့ ဖမ်းဆီးမှုတွေ ဆက်လက်ပြုလုပ်သွားမယ်လို့ ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
