မိုင်းရူပ၊ ဇန်နဝါရီ ၁၈ ရက်၊ မိုးကုတ်
မန္တလေးတိုင်း မိုးကုတ်မြို့နယ် ပိန်းပြစ်အောက်ရွာမှာ မနေ့ ဇန်နဝါရီ ၁၇ ရက် ည ၇ နာရီခွဲဝန်းကျင်က ယောင်းတိုင်မီးကနေတစ်ဆင့် နေအိမ်မီးလောင်မှု ဖြစ်ပွားခဲ့တယ်လို့ သိရပါတယ်။
“ကလေးက ဂိမ်းဆော့နေတဲ့အချိန် ဖယောင်းတိုင်မီးက နည်းနည်းဘဲ ကျန်တာ။ သူအောက်ဆင်းလာတဲ့အချိန်မှာ မီးငြိမ်းဖို့ မေ့သွားတယ်။ အဲလိုနဲ့ မီးလောင်သွားတာ” လို့ ပိန်းပြစ်ရွာခံတစ်ဦးက ရွှေဖီမြေကို ပြောပါတယ်။
မီးလောင်သွားတဲ့ နေအိမ်ဟာ မိုးကုတ်မြို့ထဲကို စစ်ကောင်စီ ဝင်ရောက်ပြီးနောက် စစ်ရှောင်နေတဲ့ အိမ်ဖြစ်ပြီး မနေ့ ဇန်နဝါရီ ၁၇ ရက်မှာ နေရပ်ပြန်လာချိန် နေအိမ်မီးလောင်မှုနဲ့ ကြုံခဲ့ရတာဖြစ်တယ်လို့ ၎င်းက ဆက်ပြောပြပါတယ်။
ရွာခံတွေက ၂ နာရီကြာ မီးငြိမ်းသတ်ခဲ့ရပြီး လူထိခိုက်သေဆုံးမှုတော့ မရှိပဲ ပျက်စီးဆုံးရှုံးမှုကို အခြေအနေကိုတော့ မသိရသေးပါဘူး။
ပြီးခဲ့တဲ့ ဇန်နဝါရီ ၁၅ ရက်မှာလည်း ရှမ်းမြောက် မူဆယ်မြို့နယ် ၁၀၅ မိုင် မိုင်းယုမှာ သားဖြစ်သူက မီးသွေးမီးဖိုထားရာကနေ နေအိမ်မီးလောင်မှုဖြစ်ပွါးခဲ့ပြီး မိခင်ဖြစ်သူကပါ မီးထဲပါသွားပြီး သေဆုံးခဲ့ပါတယ်။
လက်ရှိမှာ ပူးပြင်းတဲ့ နွေရာသီရောက်လာတော့မှာ ဖြစ်တာကြောင့် လူထုတွေအနေနဲ့ မီးဘေးအန္တရာယ်ကို ကြိုတင်သတိထားဖို့ လိုအပ်ကြောင်း ပြောဆိုကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
