မြတ်နိုး၊ ဇန်နဝါရီ ၁၉ ရက်၊ အင်ဂျန်းယန်
ကချင်ပြည်နယ်၊ အင်ဂျန်းယန်မြို့နယ် အင်ဂွမ်းလရွာမှာ ကလေးငယ်တစ်ဦး ဝက်စာအိုးထဲ ခြေချော်ကျသွားရာမှာ ရေနွေးပူ လောင်ရာကနေ ဒဏ်ရာပြင်းပြင်းထန်ထန်ရခဲ့ပြီး ဆေးဝါးကုသဖို့ ငွေကြေး အခက်ခဲဖြစ်နေကြောင်း မိသားစုဝင်တွေထံက သိရပါတယ်။
“ဝက်စာအိုးထဲ ခြေချော်ကျသွားတာ။ တကိုယ်လုံး ဝက်စာပူထဲ ဝင်သွားပြီး အပူလောင်သွားတာ။ ခေါင်းမှာတွေရောပဲ။ ဒဏ်ရာ ပြင်းထန်သွားတာ” လို့ မိသားစုဝင်တစ်ဦးက ပြောပါတယ်။
အသက် ၁ နှစ်အရွယ်သာ ရှိသေးပြီး မိဘတွေ မရှိပဲ အစ်မဖြစ်သူနဲ့ အိမ်မှာရှိနေချိန် ဖြစ်သွားတာဖြစ်ကြောင်း သူက ပြောပါတယ်။
“ဆေးကုသနေတာ ၁၂ ရက်လောက် ရှိပြီ။ ရွာဆေးခန်းကနေ မြစ်ကြီးနားက ဆေးရုံတစ်ခုမှာ ပြောင်းပြီး သွားကုနေတယ်။ ရေပူထိထားတဲ့ ဒဏ်ရာတွေပြင်းထန်တော့ ရက်ရှည်ကုသနေရမယ့် အနေအထား ဖြစ်နေတယ်” လို့ သူက ရှင်းပြပါတယ်။
ရွာက ဆေးခန်းမှာ ၁၁ ရက်လောက် ကုသခဲ့ပေမယ့် မသက်သာလို့ မြစ်ကြီးနားမြို့ဘက် သွားရောက်ပြီး ဆက်လက် ဆေးကုသမှု ခံယူနေရတယ်လို့ သူက ပြောပါတယ်။
လက်ရှိ မြစ်ကြီးနား အေးသုခဆေးရုံမှာ ဆေးကုသမှု ခံယူနေပြီး ကလေးငယ် ရေရှည် ဆေး ဆက်လက်ကုသနိုင်ဖို့ ငွေကြေး ခက်ခဲနေတာကြောင့် အကူအညီလိုအပ်နေတယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
