မိုင်းအနိုင် စုံစမ်းရေးသားသည်။
ပင်လုံညီလာခံကျင်းပခဲ့ပြီး ပင်လုံစာချုပ်ချုပ်ဆိုခဲ့တဲ့ ရှမ်းပြည်တောင်ပိုင်း ပင်လုံမြို့ဟာ မြန်မာနိုင်ငံအတွက် သမိုင်းဝင်မြို့တစ်မြို့ဖြစ်ခဲ့ပြီး အခုတော့ အဲပင်လုံမြို့နဲ့ ၃မိုင်အကွာမှာ ဧကသိန်းနဲ့ချီတဲ့ ဘိန်းစိုက်ခင်းတွေ ဝေဝေဆာဆာဖူးပွင့်လျက်ရှိနေပါတယ်။
နေရာအတိအကျပြောရရင် ပင်လုံကနေ ဟိုပုံးမြို့အနီးကို တိုက်ရိုက်ပေါက်ရောက်တဲ့ ဖြတ်လမ်းပေါ်မှာတည်ရှိပြီး ကျောက်တန်းလို့ခေါ်တဲ့ ရွာကြီးကို ဖြတ်သန်းသွားလာရတဲ့အတွက် ကျောက်တန်းလမ်းလို့လည်း အများက ခေါ်ဝေါ်ကြပါတယ်။
ကျောက်တန်းရွာနဲ့ပင်လုံမြို့ဟာ မိုင်အားဖြင့် ၄၄မိုင်ရှိပြီး အဲ၄၄မိုင်ထဲက မိုင်၂ဝလောက်ဟာ ပတ်ပတ်လည် ဘိန်းစိုက်ခင်းတွေနဲ့ ဝိုင်းရံထားပြီး ဘိန်းစိုက်ခင်းတွေဟာ မျက်စိတစ်ဆုံးထိ တွေ့မြင်ရလျက်ရှိနေပါတယ်။
“အရင်ကတော့ ဘိန်းစိုက်ခင်းတွေ မြင်ဖူးပါတယ်။ ဒါပေမယ့် ဒီလောက် များတဲ့ ဘိန်းခြံမမြင်ဖူးဘူး။ ဘယ်နားရပ်ရပ် မျက်စိတစ်ဆုံးကို မြင်ရတယ်။ အနည်းဆုံး ဧက ၁သိန်းကျော်ရှိမယ်လို့ ခန့်မှန်းရတယ်”လို့ အဲလမ်းပေါ် ဖြတ်သန်းသွားလာတဲ့ ကားသမားတစ်ဦးက မှတ်ချက်ပြုပါတယ်။
အဲဧက သိန်းနဲ့ချီတဲ့ ဘိန်းစိုက်ခင်းတည်ရှိရာဟာ အကွာအဝေးအားဖြင့် တောင်ကြီးနဲ့ မိုင်၄ဝ၊ ဟိုပုံးနဲ့ ၇မိုင် သမိုင်းဝင်မြို့ကြီးဖြစ်တဲ့ ပင်လုံနဲ့ ၃မိုင်နဲ့သာ ကွာဝေးပါတယ်။
ဘိန်းတွေစိုက်ပျိုးထားတဲ့ အဲကျောက်တန်းနဲ့ပင်လုံမြို့ကြားမှာ လက်နက်ကိုင်တွေရဲ့ ဂိတ်ပေါင်း ၅ခုရှိပြီး အဲထဲမှာ စစ်ကောင်စီလက်အောက်ခံ ပအိုဝ်းပြည်သူ့စစ်(PNO)ဂိတ်က ၂ခု၊ ရှမ်းပြည်တိုးတက်ရေးပါတီ(SSPP)ဂိတ်က ၁ခု၊ စစ်ကောင်စီဂိတ် ၁ခုနဲ့ ပင်လုံမြို့အဝင်မှာရှိတဲ့ စစ်ကောင်စီတပ်နဲ့PNOပူးပေါင်းဂိတ် ၁ခုဆိုပြီး ရှိရာ ပင်လုံမြို့အဝင်ဂိတ်က စစ်ဆေးရေးဂိတ်မှာ အဓိကအားဖြင့် မူးယစ်ဆေးဝါးကို အဓိကထားစစ်ဆေးတယ်လို့ ဆိုထားပြန်ပါတယ်။
စစ်ကောင်စီတပ်ရဲ့ တပ်စခန်းကတော့ ကျောက်တန်းနဲ့ပင်လုံအလယ်လောက်မှာ တည်ရှိကာ ဘိန်းစိုက်ခင်းတွေ ဝန်းရံထားတဲ့ တောင်ပေါ်ဘုရားမှာ တည်ရှိထားပြီး အဓိကကတော့ စစ်ကောင်စီရဲ့ ဗျူဟာက အထိုင်ချထားတယ်လို့ ဆိုပါတယ်။
လက်ရှိမှာတော့ ဘိန်းခြစ်ရာသီရောက်ရှိလာတော့မှာဖြစ်ပြီး ဘိန်းစိုက်ခင်းတောင်သူတွေကို အခြားလက်နက်ကိုင်တွေအပါအဝင် စစ်ကောင်စီတပ်ဖွဲ့ကပါ ကားနဲ့လာရောက်ပြီး လုံခြုံရေးယူပေးနေတာတွေ တွေ့မြင်ရတယ်လို့ ခရီးသွားတွေက ပြောပါတယ်။
ပင်လုံ-ကျောက်တန်းလမ်းဟာ မူလကတည်းက အေးချမ်းသာယာခဲ့ပြီး အခုလည်း အဲဒီလမ်းဟာ ဝေဝေဆာဆာဖူးပွင့်နေတဲ့ ဘိန်းစိုက်ခင်းတွေနဲ့အတူ ခရီးသွားတွေဟာ သူတို့ရဲ့ လူမှုကွန်ရက်(TikTok)မှာ အများအပြား ပြန်လည်ဝေမျှနေကြတာကို တွေ့မြင်နေရပြီး သွားရောက်လိုသူတွေလည်း များပြားနေတယ်လို့ ဆိုပါတယ်။
ဒါပေမယ့် ခရီးသွားအများစုဟာ အဲလမ်းကို သိကြခြင်းမရှိဘဲ လဲချား-တောင်ကြီး ခရီးလမ်းကို လဲချား-ပင်လုံ-လွိုင်လင်-ဟိုပုံး-တောင်ကြီး အဲပုံမှန်ခရီးလမ်းကိုသာ သွားကြပြီး အနည်းစုကသာ ပင်လုံကနေ ဟိုပုံးအနီးကို တိုက်ရိုက်ရောက်မယ့် ကျောက်တန်းလမ်းကို သွားလာနေကြတာ ဖြစ်ပါတယ်။
အချို့ကတော့ အဲလမ်းခရီးဟာ အတက်အဆင်းကြမ်းတာကြောင့် မသွားကြတာလို့ ဆိုပါတယ်။
အဲဒီလမ်းဟာ လမ်းမကြီးဖြစ်ပြီး ထူးဆန်းနေတာက Google Map မှာ ရှာဖွေလို့ မရတာဘဲ ဖြစ်ပါတယ်။ ဒီလမ်းပိုင်းကို အစပိုင်းမှာတော့ ဒေသခံတွေသာ ဖြတ်သန်းသွားလာကြပြီး လွိုင်လင်မြို့မှာ ရေးကြီးခဲ့တဲ့ လွန်ခဲ့တဲ့ ၂ဝ၂၄ခုနှစ် စက်တင်ဘာလမှသာ ခရီးသွားတွေက ဖြတ်လမ်းအဖြစ် စတင်အသုံးပြုခဲ့ကြတာ ဖြစ်ပါတယ်။
လဲချားရှိဒေသခံတစ်ဦးရဲ့ ပြောဆိုချက်အရ အဲဒီဘိန်းစိုက်ခင်းတွေဟာ လွန်ခဲ့တဲ့ ၂နှစ်က စိုက်ပျိုးခဲ့တာဖြစ်တယ်လို့ ဆိုထားတာကြောင့် စစ်ကောင်စီ အာဏာသိမ်းယူပြီးနောက် ပေါ်ထွက်လာတဲ့ ဘိန်းစိုက်ခင်းတွေယူဆနိုင်ပါတယ်။
ဒါပေမယ့် အခုလို အချိန်တိုအတွင်း ဧကသိန်းနဲ့ချီတဲ့ ဘိန်းစိုက်ခင်းတွေ အလျင်အမြန်ပေါ်ထွက်လာတာဟာ အံသြဖို့ကောင်းသလို အခုဘိန်းစိုက်ခင်းတွေဟာ စစ်ကောင်စီထိန်းချုပ်နယ်မြေဖြစ်လို့ စစ်ကောင်စီတပ်ကိုယ်တိုင် မပါဝင်ဘဲ မဖြစ်နိုင်ဘူးလို့ သွားလာနေကြတဲ့ ကားသမားတွေက ပြောပါတယ်။
၂ဝ၂၃ခုနှစ်ကနေစတင်ပြီး အဖဂန်နစ္စတန်ကို ကျော်ဖြတ်ပြီး ဘိန်းစိုက်ပျိုးထုတ်လုပ်မှုအများဆုံး ဖြစ်လာခဲ့တဲ့ မြန်မာနိုင်ငံဟာ လက်ရှိ ၂ဝ၂၅ခုနှစ်မှာလည်း ၈၈ရာခိုင်နှုန်းနဲ့ ဘိန်းစိုက်ပျိုးထုတ်လုပ်မှုအများဆုံး နိုင်ငံအဖြစ် ဆက်လက်ရပ်တည်နေဆဲဖြစ်တယ်လို့ ကုလသမဂ္ဂမူးယစ်ဆေးဝါးနဲ့ရာဇဝတ်မှုနှိမ်နင်းရေးအဖွဲ့ (UNODC)က ထုတ်ပြန်ထားပါတယ်။
ဒါပေမယ့် မြန်မာနိုင်ငံမှာတော့ လှပတဲ့ ဘိန်းစိုက်ခင်းတွေဟာ လည်ပတ်သွားစရာနေရာတစ်ခုလိုဖြစ်နေပြီး နိုင်ငံကို အုပ်ချုပ်နေတဲ့ စစ်ကောင်စီတပ်ကပင် အဲလုပ်ငန်းမှာ ပါဝင်ပတ်သတ်နေကြောင်းပါခဗျား….
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
