ရွှေဖီမြေ၊ မတ်လ ၁၁ ရက်၊ မိုးကုတ်
တအာင်းတပ်- TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့ကို စစ်ကောင်စီတပ်က ဝိုင်းဝန်းပိတ်ဆို့ထားတာကြောင့် TNLA က မြို့လုံခြုံရေးအတွက် အရေးပေါ် အခြေအနေ ကြေညာလိုက်ရတယ်ဆိုတဲ့ သတင်းအမှား ထွက်ပေါ်နေပါတယ်။
အဲဒီသတင်းအမှားကို ပြီးခဲ့တဲ့အပတ်မှာ စစ်ကောင်စီကို ထောက်ခံတဲ့ ဖေ့ဘုတ်အကောင့်အပြင် စစ်ကောင်စီဝါဒဖြန့် တယ်လီဂရမ် ချန်နယ်နဲ့ သတင်းဌာနတစ်ခုက ရေးသားဖော်ပြခဲ့တာ ဖြစ်ပါတယ်။
“TNLA က မိုးကုတ်မြို့ကို အရေးပေါ် အခြေအနေ ကြေညာလိုက်ပါပြီနဲ့ TNLA ထိန်းချုပ်ထားတဲ့ မိုးကုတ်ကို နစကတပ်တွေ ပိတ်ဆို့ထား” စတဲ့ မူရင်းစာသားနဲ့အတူ သတင်းအမှား ပြန့်နေခဲ့တာ ဖြစ်ပါတယ်။
သတင်းအမှားလင့်- https://archive.is/jilBs, https://archive.ph/0oNSH
အဲဒီသတင်းအကြောင်းအရာနဲ့ ပတ်သက်ပြီး ရွှေဖီမြေရဲ့ သတင်းတု၊ သတင်းမှား စိစစ်သူတွေက စစ်ဆေးမေးမြန်းရာမှာ ရေးသားဖော်ပြချက်ဟာ လုပ်ကြံဖန်တီးပြီး ဖော်ပြထားတဲ့ အကြောင်းအရာတွေသာဖြစ်ကြောင်းနဲ့ မြေပြင်အခြေအနေနဲ့ ကွဲလွှဲနေကြောင်း တွေ့ရပါတယ်။
မန္တလေးနဲ့ မိုးကုတ်မြို့နယ်ကြားက မတ္တရာ၊ သပိတ်ကျင်း စတဲ့နေရာမှာ စစ်တပ်နဲ့ TNLA တော်လှန်ရေး ပူးပေါင်းတပ်တို့ တိုက်ပွဲ ဖြစ်ပွားနေတာနဲ့ လေကြောင်း တိုက်ခိုက်တာတွေ နေ့စဉ် ဖြစ်ပွားတာ မှန်ပေမဲ့ မိုးကုတ်မြို့ကို စစ်ကောင်စီတပ်က ဝိုင်းပိတ်ထားတယ်ဆိုတဲ့ အကြောင်းအရာကတော့ သတင်းအမှားသာ ဖြစ်ပါတယ်။
TNLA ဖက်ကလည်း သတင်းအမှားပါ အကြောင်းအရာနဲ့ပတ်သက်ပြီး တစ်စုံတစ်ရာ သတင်းထုတ်ပြန်တာ မရှိသလို မိုးကုတ်ရှိ TNLA ရဲ့ တာဝန်ရှိသူတွေကို မေးမြန်းကြည့်ရာမှာလည်း မဟုတ်မှန်ကြောင်းသာ ရွှေဖီမြေသို့ ပြောဆိုပါတယ်။
၎င်းက “စကစက မိုးကုတ်မြို့ကို ပိတ်ဆို့တာက သတင်းအမှားသာ ဖြစ်တယ်။ မြေပြင်မှာ အဲလိုမရှိပါဘူး။ မြို့ကို အရေးပေါ်အခြေအနေ ကြေညာထားတာလည်း မရှိပါဘူး။ ပုံမှန်ပါဘဲ” လို့ ပြောပါတယ်။
ဒါ့အပြင် မိုးကုတ်မြို့ အဝင်အထွက်မှာ TNLA က စစ်ဆေးရေးဂိတ် ချထားတာကလွှဲလို့ ဘာမှထူးခြားတာ မရှိဘူးလို့လည်း နောက်ထပ် မိုးကုတ်ဒေသခံ အမျိုးသမီးတစ်ဦးက ရွှေဖီမြေကို ပြောပါတယ်။
ရွှေဖီမြေအပြင် လွတ်လပ်တဲ့ တခြားသတင်းဌာနတွေမှာလည်း မိုးကုတ်မြို့ကို စစ်ကောင်စီက ဝိုင်းဝန်းပိတ်ဆို့တာနဲ့ ပတ်သက်ပြီး သတင်းဖော်ပြထားကြတာ မရှိပါဘူး။
ဒါ့ကြောင့် စစ်ကောင်စီရဲ့ လော်ဘီချန်နယ်နဲ့ သတင်းဌာနတစ်ခုက ရေးသားဖော်ပြထားတဲ့ အဆိုပါ ဖော်ပြချက်တွေဟာ သတင်းအမှားသာဖြစ်ကြောင်း ပြောဆိုနိုင်ပါတယ်။
ဒါ့ကြောင့် ရွှေဖီမြေရဲ့ စာဖတ်ပရိသတ်တွေအနေနဲ့ လူမှုကွန်ယက်ပေါ်က သတင်းတိုင်းကို ချက်ချင်းမယုံကြဘဲ စိတ်ချရပြီး လွတ်လပ်တဲ့ သတင်းမီဒီယာတွေမှာသာ ဝင်ရောက် ရှာဖွေဖတ်ရှုကြဖို့ တိုက်တွန်းလိုက်ပါတယ်။
