သုတ၊ ဖေဖော်ဝါရီ ၁၅ ရက်၊ ဖားကန့်
စစ်ကောင်စီနဲ့ ကချင်တပ်မတော် – KIA တို့အကြား တိုက်ပွဲပြင်းထန်နေတဲ့ ကချင်ပြည်နယ် ဖားကန့်မြို့အနီးမှာ ထမင်းစားနေချိန် လက်နက်ကြီး စားပွဲဝိုင်းပေါ်ကျလို့ မိသားစုဝင် ၆ ဦး ဒဏ်ရာရခဲ့တယ်လို့ မြေပြင်အခြေအနေ သိရှိသူတွေက ရွှေဖီမြေကို ပြောပါတယ်။
မနေ့ ဖေဖော်ဝါရီ ၁၄ ရက် ညနေပိုင်းမှာ ဖားကန့်မြို့နယ် လုံခင်းရွာထဲမှာ ထမင်းစားပွဲပေါ် လက်နက်ကြီးကျရောက်ပေါက်ကွဲပြီး ကလေး ၄ ဦးအပါအဝင် မိသားစုဝင် ၆ ဦး ထိခိုက်ဒဏ်ရာရခဲ့တာ ဖြစ်ပါတယ်။
“မိသားစုထမင်းဝိုင်းပေါ် လက်နက်ကြီး ၂ လုံးကျတာ။ ကလေး ၄ ယောက်၊ လူကြီး ၂ ယောက် ဒဏ်ရာရတယ်။ ဘယ်အဖွဲ့က ပစ်တဲ့လက်နက်ကြီးတော့ မသိဘူး” လို့ မြေပြင်အခြေအနေ သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဖေဖော်ဝါရီ ၁၄ ရက် တိုက်ပွဲအတွင်း လက်နက်ကြီးနဲ့ လေကြောင်းတိုက်ခိုက်မှုတွေကြောင့် အရပ်သား ၂ ဦးထက်မနည်း သေဆုံးပြီး ၁၀ဦး နီးပါး ထိခိုက်ဒဏ်ရာရခဲ့တယ်လို့ သူက ဆက်ပြောပါတယ်။
မနေ့ ဖေဖော်ဝါရီ ၁၄ ရက်မှာ ဖားကန့်မြို့အနီး လုံခင်းကျေးရွာထဲ စစ်ကောင်စီနဲ့ KIA တပ်အကြား တိုက်ပွဲအပြင်းအထန် ဖြစ်ပွားခဲ့တယ်လို့ ဆိုပါတယ်။
ပြီးခဲ့တဲ့ ဖေဖော်ဝါရီ ပထမအပတ်ကစပြီး ဖားကန့်မြို့အနီးမှာ စစ်ကောင်စီနဲ့ ကချင်တပ်မတော် – KIA အကြား တိုက်ပွဲပြင်းထန်နေပြီး လေကြောင်း၊ လက်နက်ကြီးနဲ့ မြေမြှုပ်မိုင်းကြောင့် ဒေသခံတွေ နေ့စဉ်လိုလို သေဆုံးနေရပါတယ်။
ပြီးခဲ့တဲ့ ဖေဖော်ဝါရီ ၁၃ ရက်မှာလည်း ဖားကန့်မြို့နယ် တောင်ပြိုကျေးရွာမှာ ကလေးငယ်တွေ ဆော့ကစားနေစဉ် လက်နက်အကြွင်း ပေါက်ကွဲမှုကြောင့် အသက် ၇ နှစ်အရွယ် ကလေးတစ်ဦး သေဆုံးပြီး နောက်ကလေး ၃ ဦး ထိခိုက်ဒဏ်ရာရခဲ့ပါတယ်။
ဒါ့အပြင် ပြီးခဲ့တဲ့ ဖေဖော်ဝါရီ ၇ ရက်မှာလည်း မရှီကထောင်ရပ်ကွက်မှာ လက်နက်ကြီး ကျရောက်ပေါက်ကွဲခဲ့တာကြောင့် အရပ်သား ၃ ဦး ထိခိုက်ဒဏ်ရာရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
