မိုင်းရူပ၊ ဒီဇင်ဘာ ၃၁ ရက်၊ မန်တုံ
တအာင်းဒေသ မန်တုံမြို့နယ် နမ့်ဟိုင်း(မိုင်းဘော်)ရွာမှာ တအာင်းတပ်ရဲ့ ရဲတပ်ဖွဲ့တွေက မူးယစ်ဆေးဝါး ဝင်ရောက်စစ်ဆေးနေချိန် အမျိုးသားတစ်ဦး ပစ်ခတ်ခံရပြီး သေဆုံးသွားခဲ့တယ်လို့ ရွှေဖီမြေက စုံစမ်းသိရှိရပါတယ်။
PSLF/TNLA ရဲ့ ရဲတပ်ဖွဲ့တွေက ပြီးခဲ့တဲ့ ဒီဇင်ဘာ ၂၆ ရက်မှာ နမ့်ဟိုင်းရွာအတွင်းက မူးယစ်ဆေးဝါး ရောင်းဝယ်သုံးစွဲသူတွေကို လိုက်လံဖမ်းဆီးချိန် ထွက်ပြေးကြတာကြောင့် ရဲ့တပ်ဖွဲ့ဘက်က ပစ်ခတ်ခဲ့ရာ ဝမ်ဆုန်ဆိုသူ ထိမှန်ပြီး သေဆုံးခဲ့တာဖြစ်ပါတယ်။
ဝမ်ဆုန်ဆိုသူဟာ တရုတ်နိုင်ငံသားဖြစ်တယ်လို့ ဖေ့ဘုတ်စာမျက်နှာတချို့မှာ ဖော်ပြထားတာတွေ့ရပြီး ဖြစ်စဉ်ကို စုံစမ်းကြည့်ရာ ဝမ်ဆုန်ဟာ နမ့်ဟိုင်းရွာခံဖြစ်သလို ပလောင်အမျိုးသမီးနဲ့ အိမ်ထောင်ပြုထားသူလည်းဖြစ်ကြောင်း သိရပါတယ်။
ဒီဖြစ်စဥ်ကို သိရှိထားတဲ့ နမ့်ဟိုင်းရွာခံအမျိုးသားတစ်ဦးက “ရဲတွေက မူးယစ်ဆေးဝါးရှိတယ်လို့ သတင်းရတာထင်တယ်။ ရဲတွေက သူ့ညီကို စစ်နေတဲ့အချိန် ထွက်ပြေးလို့ သေနတ်နဲ့ လိုက်ပစ်တာ။ သူ့အစ်ကိုက ဝင်တားတဲ့အချိန်မှာ ပစ်ခတ်မိလိုက်တာ ထင်တယ်။ ရဲတွေက အရက်မူးလို့ ပစ်တာတော့ မဟုတ်ဘူး” လို့ ရွှေဖီမြေကို ပြောပါတယ်။
လက်ရှိမှာ လူသေဆုံးခဲ့ရတဲ့အထိ သေနတ်ပစ်ဖောက်ခဲ့တဲ့ အဲဒီရဲတပ်ဖွဲ့ဝင်တွေကို တအာင်းတပ်ဘက်က အရေးယူဖို့ လုပ်ဆောင်နေတယ်လို့လည်း သူက ဆက်ပြောပါတယ်။
နမ့်ဟိုင်းရွာဟာ နမ္မတူ – နမ့်ခမ်းလမ်းပိုင်းမှာ တည်ရှိပြီး တအာင်းတပ် TNLA အပြင် ကချင်တပ် KIA လည်းရှိပြီး သွားလာလှုပ်ရှားတဲ့ နေရာဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
