သုတ၊ ဖေဖော်ဝါရီ ၃ ရက်
၂၀၂၆ ခုနှစ်အတွင်း အရန်ပြည်သူ့စစ် (ဆီုက်ခြဲရဝ်) ကို မကောက်ခံဘူးလို့ တအာင်းတပ်မတော်- TNLA က ပြောထားပေမယ့် မြေပြင်မှာ ကောက်ခံတာတွေ ရှိနေတယ်လို့ ဒေသခံတွေက ရွှေဖီမြေကို ပြောပါတယ်။
“အခု ကျနော်တို့ ရွာဘက်မှာ (ဆီုက်ခြဲရဝ်) အတွက်ဆိုပြီး TNLA က လူဦးရေ တောင်းနေတာပါ။ ဘယ်နှစ်ယောက် ပေးရမယ်ဆိုတာတော့ မပြောသေးပါဘူး။ အခု TNLA တောင်းတဲ့ လူ ပေးဖို့ ရွာမှာ အစည်းအဝေး လုပ်နေရပါတယ်” လို့ တအာင်းဒေသ မန်တုံမြို့နယ်ထဲက အမျိုးသားတစ်ဦးက ရွှေဖီမြေကို ပြောပါတယ်။
တအာင်းတပ် ထိန်းချုပ်ဒေသတွေမှာ ရွှေဖီမြေက ကွင်းဆင်းချိန်အတွင်း အရန်ပြည်သူ့စစ်အတွက်ဆိုပြီး တပ်သားသစ်တွေ ကောက်ခံနေတာကိုလည်း တွေ့ရပါတယ်။
နောက်ထပ်နမ့်ခမ်းမြို့နယ်က နယ်ခံတစ်ဦးကလည်း PSLF/TNLA အနေနဲ့ အရန်ပြည်သူ့စစ် (ဆီုက်ခြဲရဝ်) ကောက်ခံနေတာနဲ့ ပတ်သက်ပြီး လူထုတွေကို မူဝါချတွေ ချပြပေးစေချင်တယ်လို့ ဆိုပါတယ်။
လက်ရှိမှာ ဒေသတွင်း တည်ငြိမ်လာပြီ ဖြစ်တာကြောင့် လုံခြုံရေးကို တအာင်းတပ်နဲ့ တအာင်းတပ်ရဲ့ ရဲဌာနကပဲ လုပ်ဆောင်သွားမှာ ဖြစ်ပြီး အရန်ပြည်သူ့စစ်တွေကို ဒီနှစ်အတွင်း ကောက်ခံသွားဖို့ မရှိဘူးလို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးက ပြီးခဲ့တဲ့ ဇန်နဝါရီလ ၁၃ ရက်နေ့မှာ ရွှေဖီမြေကို ပြောဆိုထားတာ ဖြစ်ပါတယ်။
အရန်ပြည်သူ့စစ် (ဆီုက်ခြဲရဝ်) ကို တင်းပြည့် စစ်သားအဖြစ် ခေါ်ယူတာ မဟုတ်ဘဲ ဒေသတွင်း လိုအပ်ချက်အရ ကောက်ခံရတာ ဖြစ်တယ်လို့ လွေးယေဦးက ဆိုပါတယ်။
တအာင်းတပ် PSLF/TNLA ထိန်းချုပ်ဒေသတွေမှာ ဒေသလုံခြုံရေးအတွက်ဆိုပြီး အရန်ပြည်သူ့စစ် (ဆီုက်ခြဲရဝ်) ကို အသက် ၁၈ နှစ်ကနေ ၄၅ နှစ်အောက် တအာင်းလူမျိုး အမျိုးသားတွေကို ပြီးခဲ့တဲ့ ၂၀၂၄ ခုနှစ် နှစ်ကုန်ပိုင်းကစပြီး ခေါ်နေတာ ဖြစ်ပါတယ်။
PSLF/TNLA ရဲ့ စစ်မှုထမ်းဥပဒေအရ အသက် ၁၈ နှစ်ကနေ ၃၅ နှစ်အတွင်း တအာင်းလူမျိုးတိုင်း ညီအစ်ကို ၂ ဦးနဲ့အထက်ရှိပါက တစ်ဦးဟာ တအာင်းတပ်ထံ စစ်မှုထမ်းရမှာ ဖြစ်တယ်လို့ ထုတ်ပြန်ထားပါတယ်။
အရန်ပြည်သူ့စစ် (ဆီုက်ခြဲရဝ်) ကတော့ အသက် ၁၈ နှစ်ကနေ ၄၅ နှစ်အောက် တအာင်းလူမျိုး အမျိုးသားတိုင်း TNLA ထိန်းချုပ်ထားတဲ့ ဒေသတွေမှာ လုံခြုံရေးအတွက် အလှည့်ကျ စစ်မှုထမ်းရတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
