လွေးဇွန်မိုး၊ ဇန်နဝါရီ ၇ ရက်၊ စဥ့်ကူး
မန္တလေးတိုင်း စဉ့်ကူးမြို့နယ် အနောက်တောင်ခြမ်းမှာ စစ်ကောင်စီတပ်မှ မြစ်ထဲက ကျောက်ဆူးချရပ်ထားတဲ့ ဒေသခံတွေရဲ့ သံခွန်ပေါ်ကို ဒရုန်းနဲ့ ဗုံးကြဲတိုက်ခိုက်ခဲ့လို့ အသက် ၃၀ အရွယ် ဒေသခံအမျိုးသား ၁ ဦး သေဆုံးပြီး ဒေသခံ ၅ ဦး ဒဏ်ရာရခဲ့တယ်လို့ သိရပါတယ်။
မနေ့ ဇန်နဝါရီ ၆ ရက် နေ့လည် ၁၂ နာရီဝန်းကျင်မှာ စဉ့်ကူး အနောက်တောင်ခြမ်း သဲအင်းရွာနဲ့ ကြက်တူရွေးရွာမှာ ရောက်ရှိနေတဲ့ စစ်ကောင်စီတပ်က ၄ လက်ဒရုန်း ၁ စီးနဲ့ မြစ်လယ်မှာ ကျောက်ဆူးချရပ်ထားတဲ့ ဒေသခံတွေရဲ့ သံခွန်ပေါ်ကို ၈၁ mm ဗုံးသီးကြဲချခဲ့တာဖြစ်တယ်လို့ Wetlet Informational Network တာဝန်ခံ ၁ ဦးက ပြောပါတယ်။
“သူတို့ကြဲတဲ့အချိန်မှာ သံခွန်အနောက်ခြမ်းကိုကျပြီးမှ သံခွန်တစ်စီးက မြှုပ်သွားတယ်။ မြှုပ်သလောက်ဖြစ်သွားတယ်ပေါ့နော်။ နောက်ပြီးတော့ ပြည်သူ သေဆုံးတစ်ဦးရယ် ဒဏ်ရာရ ၅ ဦးရှိတယ်လို့ သိရတယ်။ သံခွန်က ဒီမန္တလေးကနေ အထက်ပိုင်းကိုပြေးနေတဲ့ သံခွန် အဲလိုပုံစံမျိုး သံခွန်ကြီးပဲဗျာ”
အလားတူ မနေ့ ဇန်နဝါရီ ၆ ရက် မနက် ၁၀ နာရီဝန်းကျင်မှာလည်း စစ်ကိုင်းတိုင်း ဝက်လက်မြို့နယ် ရေသောက်ကန်ရွာနဲ့ ပေါက်ကန်ရွာကို စစ်ကောင်စီက ဂျက်လေယာဉ်နဲ့ ဗုံးကြဲတိုက်ခိုက်ခဲ့လို့ အရပ်သား ၄ ဦး သေဆုံးခဲ့ပါတယ်။
ဒါ့အပြင် ပြီးခဲ့တဲ့ ဇန်နဝါရီ ၅ ရက် ည ၈ နာရီခွဲဝန်းကျင်မှာလည်း ခင်ဦးမြို့နယ် ကုန်းကြီးရွာက စစ်ရှောင်တွေနေထိုင်တဲ့ စစ်ရှောင်စခန်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် သေဆုံးသူ ၃ ဦးနဲ့ ဒဏ်ရာရသူ ၁၀ ဦးထက်မနည်း ရှိခဲ့ပါတယ်။
စစ်ကောင်စီတပ်ဟာ ပြီးခဲ့တဲ့ ၂၀၂၅ ခုနှစ်နှစ်ဆန်းပိုင်းကစပြီး မန္တလေး PDF နဲ့ တော်လှန်ရေးတပ်တွေထိန်းချုပ်ထားတဲ့ စဥ့်ကူး၊ သပိတ်ကျင်းနဲ့ မတ္တရာမြို့နယ်တွေကို ထိုးစစ်ဆင်တိုက်ခိုက်နေပြီး ပြီးခဲ့တဲ့ ၂၀၂၅ ခုနှစ် ဇူလိုင် ၂၃ ရက်မှာ သပိတ်ကျင်းမြို့နဲ့ နိုင်ဝင်ဘာလမှာ မတ္တရာမြို့နယ်ကို ပြန်ထိန်းချုပ်ခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
