လွေးထွေး၊ ဇန်နဝါရီ ၁၈ ရက်၊ နမ့်စန်
ရှမ်းတောင် နမ့်စန်မြို့နယ် လွိုင်လင်-နမ့်စန် ပြည်ထောင်စုလမ်းမကြီးပေါ်မှာ ခရီးသည်တင်ယာဉ်တစ်စီး ချောက်ထဲကျခဲ့တာကြောင့် ခရီးသည် အမျိုးသား ၁ ဦး ပွဲချင်းပြီး သေဆုံးခဲ့ပြီး ၉ ဦး ဒဏ်ရာရခဲ့တယ်လို့ မြန်မာနိုင်ငံ မီးသတ်တပ်ဖွဲ့ (လွိုင်လင်)က ထုတ်ပြန်ထားပါတယ်။
ဇန်နဝါရီ ၁၇ ရက် မနက် ၁၀ နာရီ ဝန်းကျင်မှာ လွိုင်လင် – နမ့်စန် ပြည်ထောင်စုလမ်းမကြီး မိုင်တိုင် ၁၇၇/၁ အနီးမှာ ခရီးသည် ၁၁ ဦး လိုက်ပါလာတဲ့ အံစာတုံးကားတစ်စီး အရှိန်မထိန်းနိုင်တာကြောင့် ချောက်ထဲကျခဲ့တာ ဖြစ်ပါတယ်။
၎င်းလမ်းပေါ် ပြေးဆွဲသွားလာတဲ့ ကားသမားတစ်ဦးက “အဲနေရာတကျော မတော်တဆ ခဏခဏဖြစ်တယ်။ ဂရုစိုက်ဖို့ လိုတယ်။ မြင်ခဲ့ရတဲ့ မြင်ကွင်းတွေက စိတ်မချမ်းမြေ့စရာတွေဘဲ” လို့ ပြောပါတယ်။
ထိခိုက်ဒဏ်ရာရသူ အမျိုးသား ၃ ဦးနဲ့ အမျိုးသမီး ၆ ဦး တို့ကို မီးသတ်အဖွဲ့နဲ့ ကယ်ဆယ်ရေးသမားတွေက သွားရောက်သယ်ဆောင်ပေးခဲ့ပြီး လွိုင်လင်ပြည်သူ့ဆေးရုံသို့ ပို့ဆောင်ပေးခဲ့တယ်လို့ ဆိုပါတယ်။
ယာဉ်တိမ်းမှောက်မှု လျော့နည်းအောင်နဲ့ အန္တရာယ်ကင်းအောင် ခရီးသွား ကားသမားတွေအနေနဲ့ ဂရုတစိုက် မောင်းဖို့လိုအပ်ကြောင်း နောက်ထပ် နမ့်စန်ဒေသခံ အမျိုးသမီးက ဆိုပါတယ်။
ပြီးခဲ့တဲ့ ၂၀၂၅ ခုနှစ် ဒီဇင်ဘာလကလည်း လွိုင်လင်-နမ့်စန် ပြည်ထောင်စု လမ်းမပေါ်မှာ ကားမှောက်လို့ ခရီးသည် ၃ ဦး ဒဏ်ရာရခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
