လိုည်းလာဝ်ဇာရ်၊ ကျံရ်ႎှဲပ်ဘျူရီ ဆငည်း 9၊ အေဲမ်ခြီရ်
ကပီုန်ဆျှံမ်ကဒါႇပိူည် ခေဲင်လှံင်အေဲမ်ခြီရ် ကဒါႇရဝ်မန်ပူးနီန် ကားပါဂျရိုအူကြောင်းနီန် ဘရီတ်အ်ုန်ပဒူႈဖါ်ႈ ပဲန်ဟာဝ်းကားကပ္လ ကဝ်အီကောႈကား ကောန်အီမာည်းနီန်ယံမ်းဟာဝ်းဖါ်ႈ ကောန်အီမာည်း ကဝ်အီတောႇဒေဲႈအ်ုန်စီ ကတူႈဖေးဘာတ်ဟာဝ်းအောႏ။
ကဲဒါႈ ခည်ကျံရ်ႎှဲပ်ဘျူရီ ဆငည်း 7 ခီညှာကပံတ် 8 နြီလေႈအိုည်ကိူရ်မနေတ်ဒိူန် ကားပါဂျရို အီတာင်ဒေဲႈကဆာ်ႈ 60 ကပျာဝ်း အ်ုန်အီယိူဝ်ႇဒေဲႈကဒါႇပါင်ယိုက်ဂိုနီန် ဘံန်ခ္လေါႈအ်ုန်ရဝ်မန်ပူး ဒီနံင်လေႈလောင်နီန် ဘရီက်ကားအ်ုန်ပဒူႈဖါ်ႈ စီပဲန်ဟာဝ်းကားကပ္လအောႏ။
ကောန်အီမာည်း ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းဒါႈ “ အ်ုန်ဇူႈကဒါႇရဝ် ဒါႈနံင်ဟိုက်ပအေဲမ်ခြီရ်။ အ်ုန်ဒါႈနံင်ယံင်း ကဆာ်ႈနီန် ပအေဲမ်ခြီရ်။ ဘံန်ရောတ်ကဒည်ဒေင်နီန် ဘရီက်ကားအ်ုန်မာ်ပဒူႈဖါ်ႈ”
ဂေါႇကားကပ္လဒီန် ကဝ်အီကောႈကား မောင်သန်းထွန်း ဘိူန်းအဆာက် 24 ဆန်ုမ်နီန် ယံမ်းဟာဝ်းဖါ်ႈ ကဝ်အီဇီုဝ် မောင်မင်းခန့်စည်သူ ဘိူန်းအဆာက် 17 ဆန်ုမ်နီန်စီ ကတူႈဖေးဘာတ်ဟာဝ်းအောႏ။
ခည်ကျံရ်ႎှဲပ်ဘျူရီ ဆငည်း 1 ဒိူန်မာ် ခနားရဝ်ပါင်ဟာင်ဒါင်း ကာည်း အေဲမ်ငူည်းနီန် ကားပါဂျရိုနီန်ပဲန်ဖါ်ႈကပ္လ စဝ်အ်ုန်အီတောႇဒေဲႈခေဲင်ကားနီန် 5 ပါး ကတူႈဖေးဘာတ်ဟာဝ်းအောႏ။
ခည်ကျံရ်ႎှဲပ်ဘျူရီ ဆငည်း 7 ဒိူန်မာ် ခနားလာဆေဝ် ကာည်း တေင်နီနီန်မာ် ကားဒါင်းအူကြောင်ပဲန်ဖါ်ႈကပ္လ ကဝ်အီကောႈကား ကာည်း ကားစပယ်ယာနီန် ယံမ်းဟာဝ်းအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
