မိုင်းရူပ၊ ဇန်နဝါရီ ၅ ရက်
ပြီးခဲ့တဲ့ ဒီဇင်ဘာ ၂၈ ရက်တုန်းက စစ်ကောင်စီကျင်းပတဲ့ ရွေးကောက်ပွဲအပိုင်း (၁) မှာ ရှမ်းမြောက်က မြို့နယ် ၃ ခုမှာလည်း ကျင်းပခဲ့ပြီး မြို့နယ် ၃ ခုလုံးမှာ စစ်တပ်ရဲ့ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီ USDP က အနိုင်ရရှိခဲ့တယ်လို့ သိရပါတယ်။
ရှမ်းမြောက် လားရှိုး၊ မူဆယ်နဲ့ နောင်ချိုမြို့နယ်မှာ ရွေးကောက်ပွဲကျင်းပခဲ့တာဖြစ်ပြီး ပြည်သူ့လွှတ်တော်နေရာအတွက် အနိုင်ရသူစာရင်းတွေကို မနေ့ ဇန်နဝါရီ ၄ ရက်မှာ စစ်ကောင်စီရဲ့ ရွေးကောက်ပွဲကော်မရှင်က ထုတ်ပြန်ခဲ့ရာ USDP ကဘဲ အနိုင်ရတာ တွေ့ရပါတယ်။
ရှမ်းမြောက်မှာ လူထုထောက်ခံမှုရရှိတဲ့ ရှမ်းတိုင်းရင်းသားများဒီမိုကရေစီအဖွဲ့ချုပ် SNLD နဲ့ အမျိုးသားဒီမိုကရေစီအဖွဲ့ချုပ် NLD ပါတီတို့က စစ်ကောင်စီရဲ့ ရွေးကောက်ပွဲမှာ ဝင်မပြိုင်တာကြောင့် USDP က အနိုင်ရရှိခဲ့တာလို့ ရှမ်းမြောက်ဒေသခံတွေက ပြောပါတယ်။
လားရှိုးမြို့မှာ ပြီးခဲ့တဲ့ ၂၀၂၀ ရွေးကောက်ပွဲအတွင်း ပြည်သူ့လွှတ်တော်၊ ပြည်နယ်လွှတ်တော်နဲ့ အမျိုးသားလွှတ်တော်နေရာတွေမှာ NLD နဲ့ SNLD ကသာ အနိုင်ရရှိခဲ့တာဖြစ်ပြီး ဒီ ၂၀၂၅ က စစ်ကောင်စီရဲ့ ရွေးကောက်ပွဲမှာတော့ အဆိုပါ နှစ်ပါတီက ဝင်မပြိုင်တော့ပဲ USDP ကို ယှဥ်နိုင်တဲ့ ပါတီမရှိတာကြောင့် အနိုင်ရရှိခဲ့တာလို့ လားရှိုးမြို့ခံတစ်ဦးက ရွှေဖီမြေကို ပြောပါတယ်။
“အခု ရှမ်းထဲမှာ ကျားဖြူပါတီ (SNDP) ဘဲ တက်လာတဲ့ အချိန်မှာ ဘယ်ရှမ်းမှ စိတ်မဝင်စားဘူး။ ကျနော်တို့ ကိုယ်တိုင်လည်း စိတ်မဝင်စားဘူး။ မဲလည်း မထည့်ဘူး။ အဲကြောင့် ကြံံ့ခိုင်ရေးဘဲ နိုင်မှာလေ။ သူတို့ကို ယှဥ်နိုင်တာ NLD နဲ့ ကျားခေါင်း (SNLD) ဘဲ ရှိတယ်လေ”
နောင်ချိုမြို့နယ်မှာ ဒီရွေးကောက်ပွဲ ပထမအပိုင်းအတွင်း မြို့ပေါ်က နေရာတွေအပြင် ကျေးရွာပိုင်းမှာလည်း ရွေးကောက်ပွဲ ကျင်းပနိုင်ခဲ့ပြီး လားရှိုးနဲ့ မူဆယ်မြို့နယ်မှာတော့ မြို့ပေါ်နေရာတွေမှာသာ ကျင်းပနိုင်ခဲ့တာလို့ သိရပါတယ်။
ဒီရွေးကောက်ပွဲ အပိုင်း (၁) ကို မြို့နယ်ပေါင်း ၁၀၂ မြို့နယ်မှာ စစ်ကောင်စီက ကျင်းပခဲ့တာဖြစ်ပြီး မြို့နယ်အများစုမှာလည်း စစ်ကောင်စီရဲ့ USDP ပါတီကသာ အနိုင်ရတာ တွေ့ရပါတယ်။
ရွေးကောက်ပွဲအပိုင်း (၁) ကျင်းပခဲ့တဲ့ မြို့နယ် ၁၀၂ မြို့နယ်မှာ USDP က ပြည်သူ့လွတ်တော်နေရာအတွက် အနိုင်ရသူနဲ့ ပြိုင်ဘက်မရှိလို့ အနိုင်ရတဲ့ လွှတ်တော်ကိုယ်စားလှယ် (၁၁၆) နေရာရှိတယ်လို့ စစ်ကောင်စီရဲ့ ရွေးကောက်ပွဲကော်မရှင်ရဲ့ စာရင်းအရ သိရပါတယ်။
ရွေးကောက်ပွဲ ဒုတိယအပိုင်းကိုတော့ လာမယ့် ဇန်နဝါရီ ၁၁ ရက်မှာ စစ်ကောင်စီက မြို့နယ်ပေါင်း (၁၀၀) မှာ ကျင်းပဖို့ စီစဥ်နေပြီး ရှမ်းမြောက်က တန့်ယန်းနဲ့ မိုင်းရယ်မြို့နယ်တွေ ထည့်သွင်းထားတာ တွေ့ရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
