ရွှေဖီမြေ၊ ဖေဖော်ဝါရီ ၇ ရက်
တအာင်းပြည် ပညာရေးကောင်စီ- TLEC က ၂၀၂၅-၂၀၂၆ ပညာသင်နှစ်အတွင်း စာသင်ကျောင်းပေါင်း ၅၁၁ ကျောင်း ဖွင့်လှစ်နိုင်ခဲ့ပြီး ကျောင်းသူကျောင်းသား ၅၃,၆၅၃ ဦး တက်ရောက်သင်ကြားခဲ့တယ်လို့ သိရပါတယ်။
စာသင်ကျောင်းတွေကို TLEC ရဲ့ ဆရာဆရာမ အင်အား ၂,၈၇၅ ဦးနဲ့ တအာင်းတပ်မတော်- PSLF/TNLA ထိန်းချုပ်နယ်မြေအပြင် တခြား တိုင်းရင်းသား လက်နက်ကိုင်တွေရှိတဲ့ မိုင်းယော်၊ နမ့်ဖတ်ကာ၊ ၁၀၅ မိုင် (မူဆယ်)စတဲ့နေရာတွေမှာ ဖွင့်လှစ်ခဲ့တာပဲ ဖြစ်ပါတယ်။
စစ်တပ်က ကျောက်မဲ၊ သီပေါ၊ မိုးကုတ်နဲ့ မိုးမိတ်မြို့ကို ပြန်လည်ထိန်းချုပ်ပြီးနောက် ဆရာဆရာမ ၁,၀၉၈ ဦး နှုတ်ထွက်ကာ လုံခြုံရေး၊ လူမှုရေးနဲ့ စီးပွားရေး စတဲ့ကိစ္စရပ်ကြောင့် ကျောင်းသူကျောင်းသားပေါင်း ၁၆,၈၉၁ ဦးလည်း ပညာသင်ကြားခွင့် ဆုံးရှုံးခဲ့ရပါတယ်။
ထုတ်ပြန်ချက်အရ ၂၀၂၄-၂၀၂၅ ပညာသင်နှစ်မှာ TLEC က ကျောင်းပေါင်း ၆၀၃ ကျောင်း ဖွင့်လှစ်ခဲ့သလို ဆရာဆရာမ အင်အား ၃,၄၀၄ ဦးနဲ့ ကျောင်းသူကျောင်းသားပေါင်း ၆၉,၀၆၄ ဦးကို သင်ကြားပို့ချနိုင်ခဲ့တယ်လို့ ဆိုပါတယ်။
ဒါကြောင့် TLEC က ၂၀၂၅-၂၀၂၆ ပညာသင်နှစ်ရဲ့ စာသင်ကျောင်း အရေအတွက်နဲ့ ဆရာဆရာမ ဦးရေဟာ ပြီးခဲ့တဲ့ ၂၀၂၄-၂၀၂၅ ထက် ၁၅ ရာခိုင်နှုန်း လျော့ကျလာပြီး ကျောင်းသူကျောင်းသားဦးရေကတော့ ၂၂ ရာခိုင်နှုန်း လျော့ကျလာပါတယ်။
TLEC က အနာဂတ်ပညာရှင်တွေ မွေးထုတ်ပေးတဲ့ တအာင်းပညာရေး အကယ်ဒမီ (Ta’ang Education Academy- TEA)ကျောင်း အပတ်စဉ် (၃)အထိ ဖွင့်လှစ်နိုင်ခဲ့ပြီး ဒီပလိုမာအဆင့် သင်တန်းကျောင်းကို အပတ်စဉ်(၂)အထိ ဖွင့်လှစ်သင်ကြားပေးနိုင်ခဲ့ပါတယ်။
ဒါ့အပြင် တက္ကသိုလ် ဆက်လက် တက်ရောက်လိုတဲ့ ကျောင်းသူကျောင်းသားတွေကို TLEC က တအာင်းမြေ တက္ကသိုလ် (Ta’ang Land University- TLU)ကိုလည်း Wunzin Online University နဲ့ ချိတ်ဆက်ပေးပြီး အွန်လိုင်း သင်ကြားရေးစနစ်နဲ့ သင်ကြားပေးသွားမယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
