အလင်း၊ ဖေဖော်ဝါရီ ၄ ရက်၊ ဖလမ်း
ချင်းပြည်နယ်၊ ဖလမ်းမြို့ကို စစ်ကူအဖြစ် တက်လာတဲ့ စစ်ကောင်စီ စစ်ကြောင်းကို ချင်းတော်လှန်ရေး ပူးပေါင်းတပ်ဖွဲ့တွေက ကြားဖြတ်တိုက်ခိုက်ခဲ့ပြီး ဗိုလ်မှူးတစ်ဥဦးအပါအဝင် ၃၆ ဦး သေဆုံးခဲ့တယ်လို့ ရှေ့တန်းစစ်ရေးသတင်းရင်းမြစ်တွေက ရွှေဖီမြေသို့ ပြောပါတယ်။
ကလေးမြို့ (ဒကစ) မှ အင်အား ၃၀၀ ခန့် ချီတက်လာတဲ့ စစ်ကောင်စီစစ်ကြောင်းကို မနေ့ ဖေဖော်ဝါရီ ၃ ရက် မနက်ပိုင်းမှာ သိုင်းငင်းနဲ့ ဖလမ်းမြို့အကြား ဇောင်လေးကျေးရွာမှာ ချင်းပူးပေါင်းတပ်ဖွဲ့တွေက စောင့်ကြိုတိုက်ခိုက်ခဲ့တာ ဖြစ်ပါတယ်။
“ဖလမ်းမြို့ကို ပြန်လည်ထိန်းချုပ်နိုင်ဖို့ သိုင်းငင်းဘက်က အင်အား ၃၀၀ ခန့် ချီတက်လာတဲ့ စစ်ကောင်စီတပ်ရဲ့ စစ်ကြောင်း ၃ ကြောင်းကို စောင့်ကြိုပြီး ကြားဖြတ်တိုက်ခိုက်ခဲ့တာပါ။ တိုက်ပွဲက ပြင်းထန်ပြီး စကစဘက်က ထိခိုက်သေဆုံးမှု အတော်များတယ်” လို့ ရှေ့တန်းစစ်ရေးသတင်းအရင်းအမြစ်က ရွှေဖီမြေသို့ ပြောပါတယ်။
အဲဒီတိုက်ပွဲမှာ ဗိုလ်မှူးတစ်ဦးအပါအဝင် စစ်ကောင်စီတပ်ဖွဲ့ဝင် ၃၆ ဦးခန့် သေဆုံးပြီး အနည်းဆုံး ၂၀ ဦးထက်မနည်း ပြင်းထန်ဒဏ်ရာရရှိခဲ့တယ်လို့ သိရပါတယ်။
ဒါ့အပြင် စစ်ကောင်စီထံမှ လက်နက်ခဲယမ်းမျိုးစုံနဲ့ တိုက်ပွဲတွင်း လေယာဥ်နဲ့ ချပေးတဲ့ ရိက္ခာခြောက်အများပြားကိုလည်း ချင်းကာကွယ်ရေး ပူးပေါင်းတပ်တွေက သိမ်းဆည်းရမိခဲ့ပါတယ်။
“လက်နက်မျိုးစုံ ၃၃ လက် သိမ်းဆည်းရမိခဲ့ပါတယ်။ ပြီးတော့ ကျည်ဆံ ၅,၀၅၆ ထောင့်၊ M-79 ကျည် ဗုံးသီး ၄၈ လုံးလည်း သိမ်းဆည်းရတယ်။ ရိက္ခာခြောက်တွေလည်းပါတယ်။” လို့ ရှေ့တန်းစစ်ရေးသတင်းမြစ်က ရွှေဖီမြေသို့ ပြောပါတယ်။
ဖလမ်းမြို့ကို ပြန်လည်သိမ်းပိုက်နိုင်ရေးအတွက် စစ်ကောင်စီဟာ ၂၀၂၅ ခုနှစ် နိုဝင်ဘာလကတည်းက စစ်ကြောင်းနှစ်ကြောင်းခွဲပြီး ထိုးစစ်ဆင်ခဲ့ပေမဲ့ ချင်းတော်လှန်ရေး တပ်ဖွဲ့တွေရဲ့ တိုက်ခိုက်မှုကြောင့် ဖလမ်းမြို့ မရောက်နိုင်သေးပါဘူး။
အဲဒီစစ်ကြောင်းတွေဟာ ၃ လ ကျော်ကြာခဲ့ပေမဲ့ ဖလမ်းမြို့ မရောက်နိုင်သေးဘဲ ခွာန်လီရွာနဲ့ ဆုန်ဟာရမ်ရွာမှာ ခြေကုတ်နေရာယူ တပ်စွဲထားတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
