ဝတ်ရည်၊ မတ်လ ၄ ရက်၊ ဖားကန့်
ကချင်ပြည် ဖားကန့်မြို့က ရပ်ကွက်တချို့မှာ တိုက်ပွဲ ပြန်လည်ဖြစ်ပွားနေတယ်လို့ စစ်ရေးသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
မနေ့ မတ်လ ၃ ရက် နေ့လယ် ၄ နာရီခွဲမှာ ဖားကန့်မြို့ မရှီကထောင်ရပ်ကွက်မှာ စစ်တပ်က စစ်ကြောင်း ထိုးလာလို့ KIA ပူးပေါင်းတပ်နဲ့ တိုက်ပွဲ ဖြစ်ပွားခဲ့တာပဲ ဖြစ်ပါတယ်။
“မရှီကထောင်ရပ်ကွက်ကို စစ်ကောင်စီဘက်က အင်အား အလုံးအရင်းနဲ့ နေရာယူထားတယ်။ ဒီရက်ပိုင်း တိုက်ပွဲ ပြန်လည် ပြင်းထန်လာနိုင်တဲ့အခြေအနေ ရှိပါတယ်။ ဒေသခံတွေတော့ သိပ်မရှိတော့ဘူး။ တချို့အိမ်မှာက အိမ်စောင့်ထားကြတာလေ။ တချို့အိမ်ကျ အဖောက်ခံရတာတွေလည်း ရှိတယ်”
မနေ့ မတ်လ ၃ ရက် နေ့လယ် ၂ နာရီ ၅၅ မိနစ်မှာလည်း စစ်တပ်ဟာ တပ်မကုန်းနဲ့ ဆန်းကြွယ်ဘုရားကုန်းကနေ ဒေသခံတွေ နေထိုင်တဲ့ ရပ်ကွက်ဘက် လက်နက်ကြီး ပစ်ခတ်ခဲ့တယ်လို့ ဆိုပါတယ်။
ဖားကန့်မြို့မှာ တိုက်ပွဲ လဝက်ကြာ ငြိမ်သက်ခဲ့ပြီး မနေ့ မတ်လ ၃ ရက်မှာတော့ တိုက်ပွဲ ပြန်လည် ဖြစ်ပွားနေတာပဲ ဖြစ်ပါတယ်။
ဖားကန့်မှာ စစ်တပ်က နေ့စဉ်လိုလို လက်နက်ကြီးနဲ့ဒရုန်း အသုံးပြုကာ ဗုံးကြဲတိုက်ခိုက်နေတာကြောင့် ဒေသခံ ထိခိုက်သေဆုံးမှုလည်း နေ့စဉ် ရှိနေပြီး လက်ရှိမှာတော့ စစ်ကောင်စီတပ်နဲ့ KIA ပူးပေါင်းတပ်အကြား စစ်ရေး တင်းမာနေဆဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
