ရဲမာန်၊ ဒီဇင်ဘာ ၂၂ ရက်၊ အုတ်ဖို
ပဲခူးတိုင်း အုတ်ဖိုမြို့နယ်မှာ ပေါ်တာလာဆွဲတဲ့ စစ်ကောင်စီတပ်သားတွေကို ကြားဖြတ်တိုက်ခဲ့ရာ ဒု-ရဲအုပ် ဇော်ထွန်းဝင်းအပါအဝင် ၆ ဦး သေဆုံးခဲ့တယ်လို့ သိရပါတယ်။
ပြီးခဲ့တဲ့ ဒီဇင်ဘာ ၁၉ ရက် ည ၁၀ နာရီမှာ လွှစဉ်ကျေးရွာကနေ ပေါ်တာဆွဲဖို့ ထွက်လာတဲ့ စစ်ကောင်စီတပ်ဖွဲ့တွေဟာ ရန်ကုန်-ပြည်ကားလမ်းပေါ်မှာပဲ ပိတ်ဆို့ခံရပြီး တိုက်ခိုက်ခံခဲ့ရတာဖြစ်တယ်လို့ မြေအောက်ပြောက်ကျားတပ်ဖွဲ့ – အုတ်ဖိုက ထုတ်ပြန်ထားပါတယ်။
“သူတို့က ခြေမြန်တပ်ရင်း (ခမရ – ၆) နဲ့ အုတ်ဖိုရဲစခန်းကပါ။ ဆိုင်ကယ် ၅ စီး အင်အား ၁၀ ယောက်နဲ့ ထွက်လာတာပါ။ မျက်မြင်တော့ ၄ လောင်း။ ၂ ယောက်တော့ ဆေးရုံရောက်မှ သေ” လို့ မြေအောက်ပြောက်ကျားတပ်ဖွဲ့ – အုတ်ဖိုရဲ့ ရဲဘော် အောင်ဇေယျက ရွှေဖီမြေကို ပြောပါတယ်။
အဲဒီတိုက်ခိုက်မှုဟာ ၅ မိနစ်ခန့်သာ ကြာမြင့်ခဲ့ပြီး စစ်ကောင်စီတပ်ဖွဲ့ထံမှ G3 သေနတ် ၂ လက်၊ G3 ကျည် ၂၅ တောင့်နဲ့ ကျည်ဘောက် ၂ ခုလည်း သိမ်းဆည်းရမိခဲ့တယ်လို့ သိရပါတယ်။
ပြီးခဲ့တဲ့ ဩဂုတ် ၇ ရက်မှာလည်း သဖန်းပင်ဆိပ်ရွာအနီး PDF ရဲဘော်တွေကို လူထုနဲ့ မှားကာ ပေါ်တာဆွဲဖို့ လုပ်ဆောင်ခဲ့တဲ့ အရာခံဗိုလ် လှကျော်နဲ့ တပ်ကြပ်ကြီး ညီညီမိုးတို့ကို နေရာမှာတင် ရှင်းလင်းခံခဲ့ရတယ်လို့ သိရပါတယ်။
မြေအောက်ပြောက်ကျားတပ်ဖွဲ့ – အုတ်ဖိုအနေနဲ့ စစ်ကောင်စီတပ်သာမက စစ်ကောင်စီထောက်တိုင်တွေကိုပါ တိုက်ထုတ်သွားမှာဖြစ်ပြီး လူထုတွေအနေနဲ့လည်း စစ်တပ်အနီး သွားလာနေထိုင်ခြင်း မပြုကြဖို့ကို အသိပေးချက် ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
