မိုင်းဖိူမ်းဆငဲ၊ ဇန်နဝါရီ ၂၃ ရက်
“ဝ”တပ်မတော် – UWSA ထိန်းချုပ်ထားတဲ့ နယ်မြေအတွင်းထဲမှာရှိတဲ့ လုပ်ငန်းရှင်တွေအနေနဲ့ အလုပ်သမားတွေရဲ့ လုပ်အားခကို တရုတ်နှစ်ကူးမတိုင်ခင်အထိ အကုန်လုံး ရှင်းပေးရမယ်လို့ “ဝ”တပ်ဘက်က ထုတ်ပြန်ထားပါတယ်။
လုပ်ငန်းရှင်တွေဘက်က ရှောင်ပြေးတာ၊ လုပ်အားခ နောက်ကျပေးတာ၊ အပြည့်အဝ မပေးတာတွေ မကြာခဏ ဖြစ်ပွားနေတဲ့ “ဝ” ပြည်မှာ လာမယ့် ဖေဖော်ဝါရီလမှာ ကျရောက်မယ့် တရုတ်နှစ်သစ်ကူး မတိုင်ခင်အထိ အပြီးပေးဖို့ “ဝ” ပြည်တရားစီရင်ရေးကော်မတီ – WSP က သတိပေးထုတ်ပြန်ခဲ့ပါတယ်။
လုပ်ငန်းရှင်တွေအနေနဲ့ ပျက်ကွက်တာ၊ နောက်ကျတာ၊ သတ်မှတ်ချိန်အထိ လုပ်အားခမပေးတာတွေ ရှိရင် တိုင်ကြားနိုင်တယ်လို့ UWSA ရဲ့ ပြောရေးဆိုခွင့်ရှိသူ ဦးညီရန်းက ရွှေဖီမြေကို ပြောပါတယ်။
“လုပ်သားပြည်သူများ မနစ်နာစေရေးအတွက် နှစ်တိုင်းလို ကြိုထုတ်ပြန်လေ့ရှိပါတယ်။” လုပ်ငန်းရှင်တွေဖက်က ပျက်ကွက်ရင် နီးစပ်ရာ ရဲဌာန ဆက်ဆံရေးရုံးတွေမှာ တိုင်းကြားလို့ရပါတယ်” သူက ဆိုပါတယ်။
“ဝ” ပြည်မှာ အဖြစ်မြောက်ဆုံးအလုပ်က သတ္ထုလုပ်ငန်းဖြစ်ပြီး အလုပ်သမားအများစုဟာ ပြောင်းရွှေ့အလုပ်သမားတွေဖြစ်ကြသလို လုပ်ငန်းရှင်တွေက တရုတ်တွေ ဖြစ်ကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
