ပျားကြီး၊ ဇန်နဝါရီ ၁၄၊ မန္တလေး
ရွှေဈေးနှုန်း အဆမတန်မြင့်တက်မှုတွေဟာ ၅ နှစ်အတွင်းမှာ ၆ ဆနီးပါးအထိ ရှိလာပြီး အရောင်းအဝယ်တွေလည်း ရပ်ဆိုင်းလုနီးပါးဖြစ်နေတယ်လို့ မန္တလေးအခြေစိုက် ရွှေလုပ်ငန်းရှင်တွေက ပြောပါတယ်။
စစ်ကောင်စီရဲ့ အာဏာသိမ်းမှု စတင်လုပ်ဆောင်ခဲ့တဲ့ ၂၀၂၁ ခုနှစ်ကနေ ဒီကနေ့အထိ ရွှေဈေးနှုန်း မတည်ငြိမ်မှုတွေဟာ အဆိုးရွားဆုံး အခြေအနေမှာ ရှိနေတာဖြစ်ပါတယ်။
“ကမ္ဘာ့ရွှေဈေးတက်လို့ လိုက်တက်တယ်။ ကမ္ဘာ့ရွှေဈေး ကျရင်တော့ ပြန်မကျဘူး။ တင်းခံနေတယ်။ စစ်ကောင်စီကလည်း ဒါကို မကိုင်တွယ်နိုင်ဘူး။ ဈေးတက်ရင် လုပ်ငန်းရှင်တွေကို ဖမ်းတာဆီးတာမျိုးက ပြဿနာရဲ့ အဖြေမဟုတ်ဘူး။ အခုက လုပ်ငန်းရှင် အကြီးတွေရော အသေးတွေရော သတိထားနေရတာပေါ့။ အရောင်းအဝယ်တွေ မရှိသလောက်ဖြစ်သွားပြီ” လို့ မန္တလေးမြို့ခံ ရွှေလုပ်ငန်းရှင်တစ်ဦးက ပြောပါတယ်။
၂၀၂၁ ခုနှစ် စစ်တပ်အာဏာသိမ်းမှုမတိုင်ခင် ရက်ပိုင်းအလိုက ရွှေတစ်ကျပ်သားကို ငွေကျပ် ၁,၇၈၀,၀၀၀ ပဲရှိခဲ့ပေမဲ့ ဒီနေ့ ညနေ ၄ နာရီအချိန်က ရရှိခဲ့တဲ့ ဈေးနှုန်းကတော့ ၉,၈၉၀,၀၀၀ကျပ်အထိ ရှိလာခဲ့တာဖြစ်ပါတယ်။
လတ်တလောမှာ ကမ္ဘာ့ရွှေဈေးနှုန်းကလည်း တစ်အောင်စကို ဒေါ်လာ ၄၆၂၀ ကျော်အထိ စံချိန်တင် မြင့်တက်နေသေးတာကြောင့် ပြည်တွင်းရွှေဈေးနှုန်းတွေဟာ အတက်ဖက်ကို ပိုမိုဦးတည်နေသေးတယ်လို့ ရွှေလုပ်ငန်းရှင်တွေက ခန့်မှန်းတွက်ချက်ထားပါတယ်။
အခုလို ပြည်တွင်းရွှေဈေးနှုန်းတွေက မောက်ကမနဲ့ စံချိန်တင်မြင့်တက်နေပေမဲ့ စစ်ကောင်စီရဲ့ လက်ဝေခံအဖွဲ့အစည်းတစ်ခုဖြစ်တဲ့ ရန်ကုန်တိုင်း ရွှေလုပ်ငန်းရှင်များအသင်း YGEA ကတော့ တစ်ကျပ်သားကို ငွေကျပ် သိန်း ၆၀ နှုန်းနဲ့ပဲ ရောင်းချဖို့ ဆက်လက်ထုတ်ပြန်နေသေးတာကို တွေ့ရပါတယ်။
ပြီးခဲ့တဲ့ နှစ်တွေကစပြီး စစ်ကောင်စီဟာ ရွှေဈေးတက်မှုတွေကို ကိုင်တွယ်ရာမှာ ရွှေလုပ်ငန်းရှင်ကြီးတွေကို ဖမ်းဆီးခြိမ်းခြောက်အကြပ်ကိုင်တဲ့ နည်းလမ်းကိုပဲ ဆက်တိုက်ကျင့်သုံးခဲ့ပြီး လက်ရှိအချိန်ထိ မန္တလေးက ရွှေလုပ်ငန်းရှင် အတော်များများဟာ စစ်ကောင်စီဆီမှာ သတ်မှတ်ဈေးနှုန်းနဲ့ပဲ ရောင်းချပါမယ်ဆိုတဲ့ ခံဝန်ကတိကို ၃ လတစ်ကြိမ် သွားရောက်လက်မှတ်ထိုးနေရဆဲဖြစ်တယ်လို့ ရွှေလုပ်ငန်း လုပ်ကိုင်သူတွေက ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
