မိုင်းရူပ၊ ဖေဖော်ဝါရီ ၁၃ ရက်၊ ဖားကန့်
ကချင်ပြည်နယ် ဖားကန့်မြို့နယ် တောင်ပြိုကျေးရွာမှာ ကလေးငယ် ၄ ဦးက ဆော့ကစားနေစဥ် မိုင်းပေါက်ကွဲပြီး ၁ ဦး သေဆုံးကာ ၃ ဦး ဒဏ်ရာရခဲ့တယ်လို့ဖားကန့်ဒေသခံတစ်ဦးက ရွှေဖီမြေကို ပြောပါတယ်။
ဒီနေ့ ဖေဖော်ဝါရီ ၁၃ ရက် မနက် ၉ နာရီဝန်းကျင်မှာ တောင်ပြိုကျေးရွာ အိမ်ရှေ့ကုန်းပေါ်မှာ ဆော့ကစားနေစဥ် မိုင်းပေါက်ကွဲမှုဖြစ်ပွားတာဖြစ်ပြီး အသက် ၇ နှစ်အရွယ် ကလေးတစ်ဦး သေဆုံးပြီး နောက်ကလေး ၃ ဦး ထိခိုက်ဒဏ်ရာရခဲ့တာ ဖြစ်ပါတယ်။
မြေပြင်အခြေအနေသိရှိသူ ဖားကန့်ဒေသခံ အမျိုးသားတစ်ဦးက “ကျနော်သိထားတာတော့ မိုင်းကြောင့်ပေါ့နော်။ ကြိုးမိုင်းကို တိုက်မိတာဖြစ်မယ်။ ထိသွားတဲ့ ကလေးတွေက ၇ နှစ်၊ ၈ နှစ်အရွယ်တွေပေါ့။ ၇ နှစ်အရွယ်ကလေးတော့ ဆုံးသွားတယ်။ ကျန်တဲ့ မိန်းကလေးတစ်ဦးနဲ့ ယောကျာ်းလေးတစ်ဦးတော့ ဒဏ်ရာပြင်းထန်တယ်။ နောက်တစ်ယောက်က နည်းနည်းဘဲထိတာ” လို့ ရွှေဖီမြေကို ပြောပါတယ်။
မိုင်းပေါက်ကွဲမှု ဖြစ်ပွားခဲ့တဲ့ အဲနေရာဟာ ပြီးခဲ့တဲ့ ၂၀၂၅ ခုနှစ်မှာ စစ်ကောင်စီတပ်တွေ တပ်စွဲခဲ့တဲ့ နေရာဖြစ်တယ်လို့ သူက ဆက်ပြောပါတယ်။
ပြီးခဲ့တဲ့ ဖေဖော်ဝါရီ ပထမအပတ်ကစပြီး ဖားကန့်မြို့အနီးမှာ စစ်ကောင်စီနဲ့ ကချင်တပ်မတော် KIA အကြား တိုက်ပွဲပြင်းထန်နေပြီး လက်နက်ကြီးနဲ့ မြေမြှုပ်မိုင်းကြောင့် ဒေသခံတွေ မကြာခဏ ထိခိုက်သေဆုံးမှုတွေလည်း ရှိနေပါတယ်။
ပြီးခဲ့တဲ့ ဖေဖော်ဝါရီ ၁၁ ရက်မှာလည်း ဖားကန့်မြို့ မရှီကထောင်ရပ်ကွက် ရွှေမြန်မာ ဆီဆိုင်လမ်းကြားမှာ လင်မယား ၂ ဦး မိုင်းနင်းမိပြီး အမျိုးသားဖြစ်သူ ပွဲချင်းပြီး သေဆုံးခဲ့ပါတယ်။
ဒါ့အပြင် ပြီးခဲ့တဲ့ ဖေဖော်ဝါရီ ၇ ရက်မှာလည်း မရှီကထောင်ရပ်ကွက်မှာ လက်နက်ကြီး ကျရောက်ပေါက်ကွဲခဲ့တာကြောင့် အရပ်သား ၃ ဦး ထိခိုက်ဒဏ်ရာရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
