ပျားကြီး၊ ဇန်နဝါရီ ၁၀ ရက်
စစ်ကိုင်းမြို့နယ်၊ မင်းကွန်းဒေသ ထုံးဘိုကျေးရွာက စာသင်ကျောင်းကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံတွေက ပြောပါတယ်။
ထုံးဘိုကျေးရွာကို မနေ့ ဇန်နဝါရီလ ၉ ရက် ညပိုင်းမှာ လေကြောင်းတိုက်ခိုက်မှု ပြုလုပ်ခဲ့တာဖြစ်ပြီး ကျယ်လောင်တဲ့ ပေါက်ကွဲသံတွေနဲ့ တုန်ခါမှုတွေဟာ ဧရာဝတီမြစ် အရှေ့ဖက်ကမ်းမှာရှိတဲ့ မန္တလေးမြို့ပေါ်ကပါ ကြားခဲ့ရတာဖြစ်ပါတယ်။
“ငလျင်လှုပ်တယ်ဆိုပြီး အိမ်အပြင်ထွက်ပြေးကြတာ။ အသံကြီးက အကျယ်ကြီး။ ဒါမျိုးအသံက တခါမှမကြားဖူးတော့ ငလျင်လှုပ်တယ်ပဲထင်တာ။ ပြီးမှ ဗုံးကြဲတယ်ဆိုတာ သိလိုက်ရတယ်” လို့ အောင်မြေသာစံမြို့နယ်က အသက် ၅၀ အရွယ် အမျိုးသားတစ်ဦးက ပြောပါတယ်။
လေကြောင်းဗုံးကြဲမှု ၂ ကြိမ် ဆက်တိုက်ပြုလုပ်ခဲ့တာဖြစ်ပြီး ညည့်နက်ပိုင်းအထိ ပုသိမ်ကြီးမြို့နယ်၊ နန်းတော်ကျွန်းကျေးရွာမှာ အထိုင်ချ တပ်စွဲထားတဲ့ စစ်ကောင်စီတပ်တွေက လက်နက်ကြီးပစ်ခတ်မှုတွေလည်း ဆက်တိုက်ပြုလုပ်ခဲ့တယ်လို့ မန္တလေးမြို့ခံတွေက ဆိုပါတယ်။
လေကြောင်းတိုက်ခိုက်မှုကို ကြုံတွေ့ဖူးမှုမရှိတဲ့ မန္တလေးမြို့ခံတွေဟာ နေအိမ်ပြတင်းပေါက်တွေ တုန်ခါတဲ့အထိ ပြင်းထန်တဲ့ ဗုံးပေါက်ကွဲမှုကို ငလျင်လှုပ်ခတ်မှု ဖြစ်ပွားတယ်ဆိုတဲ့ ထင်မြင်မှုကြောင့် နေအိမ်အပြင်ဖက်ကို ထွက်ပြေးခဲ့ကြတာ တွေ့ရပါတယ်။
စစ်ကောင်စီဟာ မင်းကွန်းနယ်တကြောက အုန်းသဇင်၊ ထုံးဘို စတဲ့ကျေးရွာတွေဖက်ကို မနက်အစောပိုင်းအထိ လက်နက်ကြီးပစ်ခတ်မှုတွေ ဆက်တိုက်ပြုလုပ်ခဲ့တယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
