ရဲမာန်၊ ဇန်နဝါရီ ၁ ရက်၊ မြိုင်
နှစ်သစ်ကူးကြိုမဲ့နေ့မှာ စစ်ကောင်စီတပ်က မကွေးတိုင်း မြိုင်မြို့နယ်နဲ့ ရခိုင်ပြည်နယ် သံတွဲမြို့နယ်တို့ကို လေကြောင်းကနေ ဗုံးကြဲတိုက်ခိုက်လို့ အရပ်သား ၂ ဦးသေဆုံးပြီး ၂ ဦး ဒဏ်ရာရရှိတယ်လို့ သိရပါတယ်။
ပြီးခဲ့တဲ့ ဒီဇင်ဘာ ၃၁ ရက်မှာ စစ်ကောင်စီတပ်က မြိုင်မြို့နယ် ညောင်ကုန်းဆိုင်းဘုတ်အနီးကို ဂျက်ဖိုက်တာနဲ့ ပေါင် ၅၀၀ ဗုံး ၂ လုံးကြဲချတိုက်ခိုက်ခဲ့တယ်လို့ အညာမြေတပ်ပေါင်းစုက ထုတ်ပြန်ထားပါတယ်။
အဆိုပါဗုံးကြဲတိုက်ခိုက်မှုကြောင့် အရပ်သား ၂ ဦးသေဆုံးပြီး ၂ ဦးဒဏ်ရာရရှိခဲ့တဲ့အပြင် နေအိမ် ၃ လုံးလည်း ပျက်စီးခဲ့တယ်လို့ ထုတ်ပြန်ထားပါတယ်။
“ထိခိုက်သေဆုံးတာက အမျိုးသမီးတွေပါ”လို့ အညာမြေတပ်ပေါင်းစု သတင်းနဲ့ ပြန်ကြားရေးတာဝန်ခံ ကိုဘိုဘိုသန့်ဇင်က ရွှေဖီမြေကို ပြောပါတယ်။
အလားတူ ဒီဇင်ဘာ ၃၁ ရက် ည ၇ နာရီခွဲဝန်းကျင်မှာ စစ်ကောင်စီတပ်က ရခိုင်ပြည်နယ် သံတွဲမြို့ပေါ်ရပ်ကွက် ၁ ကို လေကြောင်းကနေ ပေါင် ၅၀၀ ဗုံးကြဲချတိုက်ခိုက်ခဲ့တာကြောင့် အရပ်သားနေအိမ်ပျက်စီးခဲ့ရတယ်လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
“မြို့ပေါ် အမှတ်၁ရပ်ကွက်ကို ကြဲတာ။ လူ အထိအခိုက် ရှိ၊မရှိ မသိရသေးဘူး”လို့ ဆိုပါတယ်။
ပြီးခဲ့တဲ့ ဒီဇင်ဘာ ၂၉ ရက် ည ၈ နာရီဝန်းကျင်မှာ စစ်ကောင်စီတပ်က ငပလီမြို့ လင်းသာရပ်ကွက် လင်းအောင်ရေခဲစက်အနီးကို လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေးငယ် ၃ ဦးအပါအဝင် ၉ ဦးသေဆုံးခဲ့ပြီး ၁၅ ဦးလည်း ထိခိုက်ဒဏ်ရာရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
