ပို့လဘား၊ ဒီဇင်ဘာ ၂၂ ရက်၊ မြိုင်
မကွေးတိုင်း မြိုင်မြို့နယ်ရှိ ဘုန်းကြီးကန်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ အမျိုးသမီး၁ ဦးသေဆုံးပြီး ၂ ဦးဒဏ်ရာရရှိခဲ့တယ်လို့ အညာမြေအရပ်ဖက်လူမှုကူညီရေးအဖွဲ့မှ တာဝန်ရှိသူတစ်ဦးတစ်ဦးက ရွှေဖီမြေကို ပြောပါတယ်။
မနေ့ ဒီဇင်ဘာ ၂၁ ရက် နေ့လယ် ၂ နာရီကျော်မှာ စစ်ကောင်စီတပ်က မြိုင်မြို့နယ် ဘုန်ကြီးကန်ကျေးရွာကို ဂျိုင်ရိုကော်ပတာ ၂ စီးနဲ့ လာရောက်တိုက်ခိုက်ခဲ့တာဖြစ်ပါတယ်။
“ဘုန်းကြီးကန်ကျေးရွာက ကံကြီးရွာ မြောက်ဖက်မှာ ရှိတာပါ။ တိုက်ပွဲဖြစ်ပွားတာလည်း မရှိဘူး။ စစ်ကြောင်းထိုးတာလည်းမရှိဘူး။ ကံကြီးကျေးရွာလည်း ၁၁ လပိုင်းတုန်းက လေကြောင်းတစ်ကြိမ်တိုက်ခိုက်ခံရတယ်။ ပြီးတဲ့ရက်ပိုင်းလည်း တစ်ကြိမ်ခံရတယ်။ အဲရွာက ၂ ကြိမ်ခံရတယ်” လို့ ပြောပါတယ်။
အဆိုပါ ဗုံးကြဲတိုက်ခိုက်မှုကြောင့် အသက် ၃၀ ကျော်အရွယ်ရှိတဲ့ မဆည်းဆာအောင်ဟာ သေဆုံးခဲ့တာဖြစ်ပြီး အသက် ၇၀ နှစ် အရွယ်ရှိတဲ့ အမျိုးသားတစ်ဦးနဲ့ အမျိုးသမီးတစ်ဦး ထိခိုက်ဒဏ်ရာရရှိခဲ့ကာ နေအိမ် ၃လုံးလည်း ထိခိုက်ပျက်စီးခဲ့တာ ဖြစ်တယ်လို့ ဆိုပါတယ်။
မြိုင်မြို့နယ်ထဲကို စစ်ကောင်စီတပ်က စစ်ကြောင်းထိုးလာပြီး ဒေသတွင်းရှိကျေးရွာတွေကို မီးရှို့ဖျက်ဆီးခဲ့တဲ့အပြင် ဒေသခံတွေကိုလည်း ဖမ်းဆီးသတ်ဖြတ်ခဲ့တာ ဖြစ်ပါတယ်။
ပြီးခဲ့တဲ့ နိုဝင်ဘာ ၁၉ ရက်ကလည်း မြိုင်မြို့နယ် ကံကြီးကျေးရွာကို စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာ ကြောင့် အရပ်သား ၅ ဦးသေဆုံးပြီး ၁၅ ဦးထက်မနည်း ထိခိုက်ဒဏ်ရာရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
