မြတ်နိုး၊ ဇန်နဝါရီ ၂၅ ရက်
ကချင်ပြည်နယ်၊ မိုးညှင်းခရိုင်၊ ဖားကန့်မြို့မှာ ဒီနေ့ ဇန်နဝါရီလ ၂၅ ရက်မှာ ပြုလုပ်တဲ့ စစ်ကောင်စီရဲ့ ရွေးကောက်ပွဲ အပိုင်း ၃ အတွင်း မြို့ပေါ်က မဲရုံတွေ ပိတ်လိုက်ရတဲ့ အနေအထားရှိခဲ့ကြောင်း ဒေသခံတွေဆီက သိရပါတယ်။
ဖြစ်စဉ်မှာ နှစ်ဖက်တပ်တွေ လက်နက်ကြီး ပစ်ခတ်မှုတွေ ရှိနေပြီး ဒီနေ့ ဇန်နဝါရီလ ၂၅ ရက် မနက်ပိုင်း ဆိုင်းတောင် ရပ်ကွက် ၃ မှာ လက်နက်ကြီး ကျရောက်ပေါက်ကွဲတာကြောင့် အသက် ၁၁ နှစ်အရွယ် မိန်းကလေးတစ်ဦး ဒူးမှာ လက်နက်ကြီးစ ထိမှန်ခဲ့သလို အသက် ၄၅ နှစ်အရွယ် အမျိုးသမီးတစ်ဦးလည်း ဘယ်ဘက်လက်မောင်း လက်နက်ကြီးစ ထိမှန်ခဲ့တယ်လို့ ဒေသခံတစ်ဦးက ပြောပါတယ်။
“ဖားကန့်မြို့ပေါ်မှာတော့ လုံးဝကို လူအသွားအလာ မရှိသလို တိတ်ဆိတ်ပြီးတော့ အားလုံး မဲရုံလည်း မဖွင့်နိုင်သလို မဲပေးမယ့် လူလည်း မရှိတဲ့ အနေအထားတော့ ဖြစ်နေတယ်” လို့ ပြောပါတယ်။
မနေ့ ဇန်နဝါရီလ ၂၄ ရက် ညကတည်းကနေစပြီး ပစ်ခတ်မှုတွေ၊ မြို့ထဲကို လက်နက်ကြီး ကျတာတွေ ရှိနေပြီး ဖားကန့်မြို့ထဲ စစ်ကောင်စီရဲ့ ဗျူဟာကုန်းကနေ ပြန်ပစ်တဲ့ အသံတွေ ညံနေတယ်လို့ သူက ပြောပါတယ်။
နှစ်ဖက်ပစ်ခတ်မှုတွေအတွင်း မဲရုံတာဝန်ကျသူတွေပါ လုံခြုံရာမှာ နေရတဲ့ အနေအထားဖြစ်နေပြီး ဒီနေ့ ဇန်နဝါရီလ ၂၅ ရက်မှာ နှစ်ဖက်ပစ်ခတ်မှုအကြား ဒေသခံ ၉ ဦး အထိ ထိခိုက်ဒဏ်ရာရရှိထားတယ်လို့ သိရကြောင်း သူက ပြောပါတယ်။
စစ်ကောင်စီဘက်ကတော့ ဖားကန့်မြို့ပေါ်က ရပ်ကွက် ၅ ခုမှာ ရွေးကောက်ပွဲ ကျင်းပနိုင်ဖို့ ဇန်နဝါရီ ၂၃ ရက်နေ့ကစ မြို့အဝင်အထွက်ကို ပိတ်ပြီး လော့ဒေါင်းချထားလိုက်တာ ဖြစ်ပါတယ်။
ဖားကန့်မြို့နယ်အတွင်းက စစ်ကောင်စီတပ်တွေ ထိန်းချုပ်ထားတဲ့ ကာမိုင်းမြို့နယ်ခွဲ၊ ကပ်မှော်ဇွပ်၊ နန့်ယား စတဲ့နေရာတွေမှာတော့ ရွေးကောက်ပွဲ ကျင်းပနိုင်လိမ့်မယ်လို့ ဆိုပါတယ်။
စစ်ကောင်စီလက်အောက်ခံ ရွေးကောက်ပွဲကော်မရှင်ရဲ့ ထုတ်ပြန်ချက်အရ ဖားကန့်မြို့နယ် လုံးခင်း၊ နမ့်ဖဖြစ်၊ ဆိပ်မူ၊ ဟောင်ပါး၊ ဂေါရီ၊ နန့်စီအင်၊ ကထန်ယန်နဲ့ ကပ်မှော်ဇွပ် ကျေးရွာအုပ်စုတွေကို ရွေးကောက်ပွဲ မကျင်းပနိုင်ကြောင်း သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
