ယာရူစိင်၊ ဒီဇင်ဘာ ၁၉ ရက်၊ ခင်ဦး
စစ်ကိုင်းတိုင်း ခင်ဦးမြို့နယ်အတွင်းမှာ ခရီးသွားဒေသခံတွေရဲ့ ယာဉ်တန်းပိတ်မိနေတဲ့အချိန်ကို စစ်ကောင်စီတပ်က ဗုံးကြဲတိုက်ခိုက်ခဲ့တာကြောင့် ဒေသခံ ၁၂ ဦးထက်မနည်း သေဆုံးခဲ့ရတယ်လို့ ဒီဖြစ်စဉ်ကို သိရှိထားသူ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဒီဇင်ဘာ ၁၈ ရက် နေ့လယ် ၁၂ နာရီဝန်းကျင်အချိန်မှာ စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် ခင်ဦးမြို့နယ်အတွင်းက ရွှေဘို- မြစ်ကြီးနား ဗျူဟာလမ်းပေါ်က မြေနီသျှိူလမ်းဆုံအနီးမှာရှိတဲ့ ဆီခြံပေါ် ကျရောက်ပေါက်ကွဲခဲ့ပြီး ဒဏ်ရာရသူတွေလည်း အများအပြားရှိတယ်လို့ ဆိုပါတယ်။
“အဓိကတော့ ကားတွေပိတ်တဲ့အချိန်ဆိုတော့ ထိခိုက်သေဆုံးမှုက များသွားတာပါ။ အဲဒီအနားမှာ လိုင်းသုံးလို့ရတဲ့နေရာတခုရှိတယ်။ လိုင်းသုံးတဲ့ သူတွေလည်း ထိခိုက်ဒဏ်ရာရကြပါတယ်။ ဒဏ်ရာရသူစာရင်း အတ်ိအကျတော့ ကျနော်လည်း အတည်မပြုနိုင်ပါဘူး။ ဆီခြံပေါ်ကျတော့ ပေါက်ကွဲမှုဖြစ်ပြီး မီးလောင်မှုလည်း ဖြစ်သွားပါတယ်”
စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် ပိတ်မိနေတဲ့ ခရီးသွားဒေသခံ၊ အနီးရှိ စျေးသည်နဲ့ စတဲ့ဒေသခံတွေ သေဆုံးခဲ့ရတယ်လို့ ဒီဖြစ်စဉ်ကို သိရှိထားသူ အမျိုးသားတစ်ဦးက ဆက်ပြောပါတယ်။
ပြီးခဲ့တဲ့ ဒီဇင်ဘာလ ၁၇ ရက်လည်း ခင်ဦးမြို့နယ်အတွင်းမှာ စစ်ကောင်စီတပ်က လေယာဉ် ၅ စီးနဲ့ ဗုံးကြဲတိုက်ခိုက်ခဲ့တာကြောင့် ဒေသခံ ၇ ဦးထက်မနည်း သေဆုံးခဲ့ရပါတယ်။
ဒါ့အပြင် စစ်ကောင်စီတပ်ဟာ ဝက်လက်မြို့နယ်အပါအဝင် စစ်ကိုင်းတိုင်းထဲက တော်လှန်ရေးတပ်တွေ ထိန်းချုပ်ထားတဲ့ နေရာတွေကို လေကြောင်းအပါအဝင် စစ်ကြောင်းထိုးတာတွေ ထိုးစစ်ဆင် တိုက်ခိုက်တာတွေ ပြုလုပ်ခဲ့တာကြောင့် အရပ်သားထိခိုက်သေဆုံးမှုတွေလည်း နေ့စဉ်နေ့တိုင်း ရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
