မိုင်းရူပ၊ ဒီဇင်ဘာ ၂၂ ရက်၊ မိုးကုတ်
မန္တလေးတိုင်း မိုးကုတ်မြို့ထဲကို စစ်ကောင်စီတပ် ပြန်ဝင်ရောက်လာပြီး ရက်ပိုင်းအကြာမှာ ဖမ်းဆီးခံခဲ့ရတဲ့ ပိန်းပြစ်လီဆူရွာက လီဆူလူမျိုး အမျိုးသား ၃ ဦး ပြန်လွှတ်လာပြီလို့ သိရပါတယ်။
သူတို့ ၃ ဦးကို စစ်ကောင်စီတပ်က ပြီးခဲ့တဲ့ ဒီဇင်ဘာလ ၁၉ ရက်မှာ ပြန်လွှတ်ပေးခဲ့တာဖြစ်တယ်လို့ ဖြစ်စဉ်သိသူ မိုးကုတ်ဒေသခံ အမျိုးသမီးတစ်ဦးက ရွှေဖီမြေကို ပြောပါတယ်။
“စကစ ဖမ်းထားတဲ့ လီဆူ ၃ ယောက် ပြန်လွှတ်လာပြီ။ ဖမ်းခံရတဲ့အချိန် ရိုက်ခံထားရတယ်” လို့ ဆိုပါတယ်။
မိုးကုတ်မြို့အနီးက ပိန်းပြစ်လီဆူရွာခံဖြစ်တဲ့ ဦးသိန်းလေး၊ ဦးဆီးမီး၊ မောင်ဇီဆီးတို့ ၃ ဦးကို စစ်ကောင်စီတပ်က မိုးကုတ်မြို့အဝင် ၅ မိုင်ဂိတ်မှာ ပြီးခဲ့တဲ့ ဒီဇင်ဘာ ၂ ရက်မှာ ဖမ်းဆီးခဲ့တာဖြစ်ပါတယ်။
လက်ရှိမှာ မိုးကုတ်မြို့အဝင်အထွက်ကို စစ်ကောင်စီက ဖြတ်သန်းသွားလာခွင့်ပြုထားပြီး စစ်ဆေးမှုတွေတော့ တင်းကြပ်ထားတယ်လို့ ၎င်းက ဆက်ပြောပါတယ်။
လက်ရှိမှာ မိုးကုတ်မြို့က မြို့ခံအနည်းစုလောက်သာ နေရပ်ပြန်လာကြသေးပြီး ဒီရက်ပိုင်းအတွင်း မြို့ပြင်မှာ ပစ်ခတ်သံတွေ မကြားရပဲ ငြိမ်သက်နေတယ်လို့ သိရပါတယ်။
စစ်ကောင်စီတပ်ဟာ တရုတ်နိုင်ငံရဲ့ ကြားဝင်မှုနဲ့ ပြီးခဲ့တဲ့ နိုဝင်ဘာ ၂၉ နဲ့ ၃၀ ရက်မှာ တအာင်းတပ်မတော် TNLA ထိန်းချုပ်ခဲ့တဲ့ မိုးမိတ်နဲ့ မိုးကုတ်မြို့ထဲကို ဝင်ရောက်လာတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
