လွေးလာဝ်ဇာရ်၊ ဇန်နဝါရီ ၂၅ ရက်၊ ကောလင့်
စစ်ကိုင်းတိုင်း ကောလင်းမြို့နယ်အရှေ့ဘက်ခြမ်းက ရှမ်းကုန်းရွာကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်မှုကြောင့် ဒေသခံ ၁ ဦးသေဆုံးပြီး ၃ ဦးဒဏ်ရာရခဲ့တယ်လို့ ဒေသခံတစ်ဦးက ရွှေဖီမြေကိုပြောပါတယ်။
မနေ့ ဇန်နဝါရီ ၂၄ ရက် ညနေ ၆ နာရီဝန်းကျင်မှာ ဂျက်ဖိုက်တာလေယာဉ်နဲ့ လာရောက် ဗုံးကြဲတိုက်ခိုက်ခဲ့တယ်လို့ ဆိုပါတယ်။
“စစ်ကြောင်းကရွာနဲ့ မနီးမဝေးမှာအထိုင်ချနေတာ။ ရွာကလူတွေက စစ်ရှောင်နေရတယ်။ ရွာထဲ ပြန်မဝင်ရဲကြသေးဘူး။ အဲဒီထိတဲ့သူတွေကလည်း စစ်ရှောင်ရင်း တိရစ္စာန်လေးတွေ မွေးထားတော့ အစာပြန်ကျွေးနေတဲ့အချိန်မှာ ထိတာ” လို့ ပြောပါတယ်။
စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် အသက် ၄၀ ကျော် အမျိုးသား ၁ ဦး သေဆုံးခဲ့ပြီး ထိခိုက်ဒဏ်ရာရသွားတဲ့ ဒေသခံ ၃ ဦးလည်း အမျိုးသားဘဲဖြစ်တယ်လို့ သိရပါတယ်။
Kawlin Infoမှ တာဝန်ရှိသူတစ်ဦးက “သေဆုံးသူကော ဒဏ်ရာရတဲ့သူတွေကော အကုန်လုံး အမျိုးသားတွေချည်းဘဲ။ သူတို့ရဲ့ နာမည်တွေတော့ မသိရဘူး” လို့ ပြောပါတယ်။
ပြီးခဲ့တဲ့ ဇန်နဝါရီ ၁၈ ရက်မှာ ကောလင်းအရှေ့ခြမ်းက တောင်မော်ရွာထဲကို စစ်ကြောင်းထိုး ဝင်ရောက်လာတဲ့ စစ်ကောင်စီတပ်ဖွဲ့တွေဟာ အရပ်သား ၁ ဦးကို ပစ်သတ်သွားခဲ့တယ်လို့ သိရပါတယ်။
ကောလင်းမြို့နယ်ထဲကို စစ်ကောင်စီတက်ဘက်က စစ်ကြောင်းထိုးကာ နေအိမ်တွေ မီးရှို့ဖျက်ဆီးသွားခဲ့တဲ့အပြင် လေကြောင်းနဲ့အသုံးပြုပြီး မကြာမဏ ဗုံးကြဲတိုက်ခိုက်မှုတွေ ပြုလုပ်ခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
