ဝတ်ရည်၊ ဖေဖော်ဝါရီ ၄ ရက်၊ ဖားကန့်
တိုက်ပွဲတွေ ပြင်းထန်နေတဲ့ ကချင်ပြည်နယ် ဖားကန့်မြို့မှာ စစ်ကောင်စီတပ်က လေကြောင်းကနေ ဗုံးဆက်တိုက်ကြဲချတိုက်ခိုက်နေတာကြောင့် ဒေသခံတွေ ထိခိုက်မှုရှိတယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ဖားကန့်မြို့ မရှီကထောင်ရပ်ကွက်မှာ ဒီနေ့ ဖေဖော်ဝါရီ ၄ ရက် မနက် ၈ နာရီခွဲဝန်းကျင်ကနေ နေ့လယ် ၂ နာရီဝန်းကျင်အထိ လေကြောင်းကနေ ၃ ကြိမ် စစ်ကောင်စီတပ်က Y12 နဲ့ ဗုံးအလုံးရေ ၂၀ ထက်မနည်း ကြဲချတိုက်ခိုက်ခဲ့တယ်လို့ ဆိုပါတယ်။
“မနက် ၈ နာရီခွဲမှာ တစ်ကြိမ်ကြဲတယ်။ မရှီကထောင်တကျော့ဘက်မှာ ဆက်တိုက်ကြဲသွားတယ်။ ကျေးရွာတွေမှာလည်း ကျတယ်။ ထိခိုက်မှုတွေလည်း ရှိပါတယ်ဗျ။ လက်ရှိအချိန်ထိတော့ ဒေသခံ ၅ ယောက်လောက် ဒဏ်ရာရတယ်လို့တော့ လောလောဆယ်သိထားပါတယ်”
ပြီးခဲ့တဲ့ ဇန်နဝါရီ ၂၄ ရက်ကနေ ဒီနေ့ ဖေဖော်ဝါရီ ၄ ရက်အထိ တိုက်ပွဲတွေ ပြင်းထန်နေပြီး ဒေသခံ ထိခိုက်သေဆုံးမှုတွေလည်း နေ့စဉ်ရက်ဆက်ရှိနေတယ်လို့ ဆိုပါတယ်။
ရွှေဖီမြေက ပြုစုထားတဲ့စာရင်းတွေအရ ပြီးခဲ့တဲ့ ဖေဖော်ဝါရီ ၁ ရက်ကနေ ဒီနေ့ ဖေဖော်ဝါရီ ၄ ရက်အထိ တိုက်ပွဲကာလအတွင်းမှာ ဒေသခံ ၂ ဦး သေဆုံးခဲ့ပြီး အသက် ၂ နှစ်အရွယ် ကလေးငယ်အပါအဝင် ၂၀ ဦးထက်မနည်း ထိမှန်ဒဏ်ရာရရှိခဲ့ပါတယ်။
တိုက်ပွဲတွေ တကျော့ပြန်လည်ပြင်းထန်နေတာကြောင့် ဖားကန့်က ဒေသခံအများစုဟာ စစ်ဘေးရှောင်ကြရန် ပြင်ဆင်နေကြရတယ်လို့ ဆိုပါတယ်။
ဖားကန့်မှာ စစ်တပ်က နေ့စဉ်လိုလို လက်နက်ကြီးနဲ့ ဒရုန်း အသုံးပြုကာ ဗုံးကြဲတိုက်ခိုက်နေတာကြောင့် ဒေသခံ ထိခိုက်သေဆုံးမှုလည်း တိုးလာနေပြီး လက်ရှိမှာတော့ စစ်ကောင်စီတပ်နဲ့ KIA ပူးပေါင်းတပ်အကြားလည်း စစ်ရေး တင်းမာနေဆဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
