အိုက်ပွီး၊ ဒီဇင်ဘာလ ၃၀ ရက်၊ ဖလမ်း
ချင်းပြည်နယ်၊ ဖလမ်းမြို့အနီးက Khuangli ရွာ တိုက်ပွဲမှာ တပ်ကြပ်ကြီးတစ်ဦးအပါအဝင် စစ်ကောင်စီ တပ်ဖွဲ့ဝင် (၃) ဦး သေဆုံးခဲ့ပြီး စစ်သုံ့ပန်း (၄) ဦး ဖမ်းဆီးရမိခဲ့တယ်လို့ ရှေ့တန်း စစ်ရေးသတင်းမြစ်က ရွှေဖီမြေသို့ ပြောပါတယ်။
မနေ့ ဒီဇင်ဘာလ ၂၉ ရက် ညနေ ၅ နာရီမှာ ဖလမ်းမြို့အနီး Khuangli ကျေးရွာမှာ နေရာရယူထားတဲ့ စစ်ကောင်စီ စစ်ကြောင်းကို ချင်းကာကွယ်ရေး ပူးပေါင်းတပ်တွေက တိုက်ခိုက်စဥ် ဖမ်းဆီးရမိခဲ့တာဖြစ်ပါတယ်။
“တိုက်ပွဲဖြစ်တာက ၁ နာရီလောက်ပဲ။ စစ်ကောင်စီဘက်က ၃ယောက် သေတယ်။ အရှင် ၄ ယောက် ဖမ်းမိထားတယ်။ လက်နက်၊ ခဲယမ်းတွေလည်း သိမ်းဆည်းရမိတာရှိတယ်။”လို့ ရှေ့တန်းစစ်ရေးသတင်းရင်းမြစ်တစ်ဦးက ရွှေဖီမြေသို့ ပြောပါတယ်။
အဲဒီတိုက်ပွဲမှာ စစ်ကောင်စီထံက လက်နက်ကြီး၊ လက်နက်ငယ် ၁၀ လက်နဲ့ ကျည်အိမ်၊ ကျည်ဆန်၊ ဆိုလာပြား တို့ကိုလည်း သိမ်းဆည်းရမိသလို Khuangli ရွာကိုလည်း ချင်းကာကွယ်ရေး ပူးပေါင်းတပ်တွေက ထိန်းချုပ်ထားတယ်လို့ သိရပါတယ်။
လက်ရှိ ဖလမ်းမြို့နယ်က နေရာ ၃ ခုထက်မနည်းမှာ ချင်းတော်လှန်ရေးပူးပေါင်းအဖွဲ့နဲ့ စစ်ကောင်စီတပ်တို့ တိုက်ပွဲဖြစ်ပွားပြီး လေကြောင်းတိုက်ခိုက်မှု နေ့စဥ်ရှိတယ်လို့ သိရပါတယ်။
“ဖလမ်းမှာ ထိတွေ့မှု နေ့တိုင်းရှိတယ်။ လေကြောင်းက တိုက်ပွဲပြင်းထန်တာ သူတို့ဘက်က အထိနာများတာ စစ်ကြောင်းတွေကို လမ်းရှင်းပေးတဲ့ချိန်မှာ တိုက်ခိုက်တာရှိတယ်။” လို့ ရှေ့တန်းစစ်ရေးသတင်းအရင်းမြစ်က ရွှေဖီမြေသို့ ပြောပါတယ်။
ဖလမ်းမြို့နယ်တိုက်ပွဲတွေကြောင့် ဒေသခံပြည်သူ ထောင်နဲ့ချီဟာ အိန္ဒိယနိုင်ငံ၊ မီဇိုရမ်ပြည်နယ်ဘက်ကို ထွက်ပြေးတိမ်းရှောင်နေကြရတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
